"Turan Tovuz" 32 ildən sonra "Fənərbağça" ilə üz-üzə gələcək

Bu gün Bakıda "Turan Tovuz" və Türkiyənin "Fənərbağça" komandaları arasında yoxlama oyunu keçiriləcək.

BAKU.WS xəbər verir ki, qarşılaşma saat 20:00-da Tofiq Bəhramov adına Respublika stadionunda başlayacaq. Görüşü baş hakim Rəvan Həmzəzadə idarə edəcək.

Matçdan əldə olunan gəlir Qarabağ Dirçəliş Fonduna ianə ediləcək.

Qeyd edək ki, iki komanda sonuncu dəfə 1994-cü ildə UEFA Kubokunda qarşılaşıb. Həmin vaxt Azərbaycanı avrokuboklarda təmsil edən ilk klub olan "Turan" İstanbul təmsilçisinə hər iki oyunda məğlub olub. "Fənərbağça" ilk görüşdə 5:0, cavab matçında isə 2:0 hesabı ilə qalib gəlib.