Tramp administrasiyasına etiraz edən senator 25 saat danışıb

ABŞ-nin Demokrat senatoru Kori Buker prezident Donald Trampın siyasətlərinə etiraz etmək üçün Senat kürsüsündə 25 saat 4 dəqiqə fasiləsiz çıxış edərək, "Senat tarixinin ən uzun çıxışı" rekordunu qırıb.

BAKU.WS trt haber-ə istinadən xəbər verir ki, o, çıxışında Tramp administrasiyasının büdcə ixtisarlarını, federal işdən çıxarmaları və Hökumət Effektivliyi Departamentinin (DOGE) xərcləri azaltmaq siyasətini tənqid edib. O, "Ölkəmizin böhran içində olduğuna inanıram" deyərək, çıxışını davam etdirib.

Senat qaydalarına görə çıxışına maneə olmadığı üçün Buker kürsünü tərk etməyib və iclasın davam etməsini təmin edib. Onun çıxışı 1957-ci ildə 24 saat 18 dəqiqə danışan senator Strom Türmonda məxsus rekordu geridə qoyub. Buker çıxışının məqsədinin Trampın "səhv siyasətlərinə" diqqət çəkmək olduğunu bildirib.