Avropa liderləri Donald Trampdan şikayətləndilər

Avropa İttifaqı ölkələrinin rəhbərləri ABŞ prezidenti Donald Tramp administrasiyasının Rusiya–Ukrayna münaqişəsinin həlli üzrə aparılan sülh danışıqları barədə onları məlumatlandırmadığından şikayətləniblər.

BAKU.WS xəbər verir ki, bu barədə "The Washington Post" (WP) qəzeti Avropa İttifaqındakı (Aİ) yüksəkvəzifəli mənbələrə istinadən yazıb.

Nəşr yazdığına əsasən, Trampın yanaşmasına görə Avropa liderləri daim məlumatsız durumda qalır, baş verən son hadisələri yalnız sızmalar və xəbərlər vasitəsilə öyrənirlər.

WP-yə danışan Avropa İttifaqının Təhlükəsizlik Araşdırmaları İnstitutunun analitiki və NATO siyasəti üzrə keçmiş müşaviri Cuzeppe Spatafora bildirib ki, bu fikir Avropa liderləri arasında getdikcə daha geniş yayılır.

Ekspertin sözlərinə görə, avropalılar yeni reallığa uyğunlaşmalıdırlar.

Bundan əvvəl "Der Spiegel" yazmışdı ki, Fransanın prezidenti Emmanuel Makron və Almaniyanın kansleri Fridrix Mers Trampa dərin etimadsızlıq göstərirlər. Makron və Mersin Ukrayna lideri Vladimir Zelenski ilə söhbətlərinin stenoqramına görə, onlar həmkarları ilə Ukraynanın xəyanətə uğrama ehtimalının mövcud olduğunu bölüşüblər.