"Trabzonspor"lu futbolçu, azərbaycanlı həkim və silah...

Polşalı sabiq futbolçu Miroslav Şımkovyak Türkiyənin "Trabzonspor" klubunda çıxış etdiyi dövrdə yaşadığı maraqlı hadisəni danışıb.

BAKU.WS xəbər verir ki, o, Trabzonda futbolçular arasında qeyri-adi bir ənənənin olduğunu bildirib. Belə ki, müəyyən sayda qol vuran oyunçular silah mağazasına aparılır və onlara istədikləri silahı seçmək imkanı yaradılırmış.

Şımkovyakın sözlərinə görə, ona da belə bir silah təqdim edilib. Lakin polşalı futbolçu silahdan istifadə etməkdən qorxduğunu bildirərək hədiyyəni qəbul etməyib və heç bir sənədə imza atmadan onu komandanın həkiminə verib.

O, klubun həkiminin azərbaycanlı olduğunu xüsusi vurğulayıb:

"Silahdan qorxduğumu və onu istəmədiyimi dedim. Əslində, Trabzona ilk gəldiyim vaxt müqavilə imzalayarkən də məndən silah istəyib-istəmədiyimi soruşmuşdular. Mən isə silahın mənə nə lazım olduğunu soruşdum. Cavab verdilər ki, burada hamının silahı var. Mən oynadığım dövrdən danışıram, indi vəziyyətin necə olduğunu bilmirəm".

Qeyd edək ki, Miroslav Şımkovyak 2005-2006-cı illərdə "Trabzonspor"un formasını geyinib. O, Polşa yığmasının da üzvü olub və 2006-cı ildə Almaniyada keçirilən dünya çempionatında iştirak edib.