Azərbaycanlı PR mütəxəssis beynəlxalq müsabiqənin münsiflər heyətində iştirak edib

Azərbaycanlı İctimaiyyətlə Əlaqələr (PR) mütəxəssisi Rusiyanın paytaxtı Moskvada keçirilən Beynəlxalq İctimaiyyətlə Əlaqələr Mütəxəssisləri Assosiasiyasının (İPRA) “Eventiada IPRA Golden World Awards 2018” müsabiqəsində münsiflər heyətində iştirak edib. Bu barədə müsabiqənin rəsmi internet səhifəsində - https://www.ldfforum.com/en/ məlumat verilir. Münsiflər heyətinin tərkibində iştirak etmiş İlham Məmmədovun sözlərinə görə Rusiyanın paytaxtı Moskva şəhərində keçirilən beynəlxalq müsabiqəyə 01.09.2017-01.10.2018 tarixləri aralığında icra edilən layihələr təqdim edilmişdi. Müsabiqənin predmetləri gənclər, şirkətlər, agentliklər, yerli və regional icra orqanları, peşəkar assosiasiyalar, universitetlər və digər tədris və ixtisaslaşmış müəssisələr tərəfindən reallaşdırılmış kommunikasiya layihələri təşkil edib. PR mütəxəssis bildirib ki, müsabiqəyə təqdim edilən layihələrə qarşı bir sıra tələblər irəli sürülmüşdü. Belə ki, bu layihələr özündə etik qaydalara cavab verməli, spirtli içkilər, tütün məmulatları, zorakılıq, milli və digər ayrıseçkiliklər daşımamalıdılar. “Müsabiqəyə dünyanın 20-ə yaxın ölkəsindən 10 nominasiya üzrə yüzdən artıq layihə təqdim edilmişdi. Bunlar “Korporativ kommunikasiyalar”, “Rəqəmsal və SMM Layihələr”, “Sosial layihələr”, “İlin ən yaxşı tədbiri”, “İctimai layihələr”, “Ümumi layihələr”, “Marketinq kommunikasiyaları”, “Ən yaxşı könüllü layihəsi”, “Ən yaxşı mədəni layihə” və “İdman kommunikasiyası sahəsində ən yaxşı layihə” nominasiyaları olub” deyən İ.Məmmədov yaxın gələcəkdə bu müsabiqənin Azərbaycanda da baş tutacağına əmin olduğunu bildirib. Qeyd edək ki, İlham Məmmədov uzun illər ölkə mediasında jurnalist kimi, daha sonra isə dövlət və özəl sektorda ictimaiyyətlə əlaqələr sektorunda rəhbər vəzifələrdə çalışıb. O, həmçinin “Azərbaycan İctimaiyyətlə Əlaqələr Mütəxəssisləri Assosiasiyasının” (APRA) həmtəsisçisi, “Baku School of Public Relations” şirkətinin rəhbəridir. Hazırda İlham Məmmədov “Veysəloğlu” şirkətlər qrupunun İctimaiyyətlə əlaqələr departamentinin rəhbəridir. BAKU.WS