ABŞ-ni istedadlı mütəxəssislər tərk etməyə başlayıb - SƏBƏB

ABŞ-də immiqrasiya qanunvericiliyinin sərtləşdirilməsi ixtisaslı mütəxəssislərin ölkədən getməsinə və transmilli korporasiyaların ölkədəki fəaliyyətlərini yenidən nəzərdən keçirməsinə səbəb olub.

BAKU.WS xəbər verir ki, bu barədə "Financial Times" məlumat yayıb.

Nəşrin yazdığına görə, ABŞ Prezidenti Donald Tramp tərəfindən təşəbbüs edilən islahatlardan sonra dünyanın ən böyük şirkətləri dəyərli əməkdaşlarını itirməklə üzləşiblər. Onların bir qismi digər ölkələrə köçürülüb.

Bildirilir ki, peşəkar xidmətlər göstərən şirkətlər, texnologiya korporasiyaları və sənaye konqlomeratları viza müraciətlərinə baxılma müddətinin uzadıldığını və imtina hallarının artdığını qeydə alırlar. Nəticədə bəzi mütəxəssislər ABŞ-dən kənarda qalır və geri qayıtmaq imkanı əldə edə bilmirlər.

Ekspertlərin fikrincə, Tramp administrasiyasının sərtləşdirdiyi immiqrasiya siyasəti beynəlxalq kadr axınına həm ABŞ-yə, həm də ştatlardan kənara doğru ciddi təsir göstərib. Son bir ildə çoxlu sayda alim, tədqiqatçı və digər yüksək ixtisaslı mütəəxəssislər yeni siyasətin nəticələrindən, viza məhdudiyyətlərindən və deportasiya riskinin artmasından ehtiyat edərək xaricdə iş imkanları axtarmağa başlayıblar. Müşahidəçilərin qiymətləndirməsinə görə, bu proses "beyin axını"na səbəb olub.

"VisaVerge.com" portalı qeyd edir ki, baş verən dəyişikliklər təkcə fərdi talelərə təsir göstərmir, eyni zamanda ABŞ-nin texnologiya, elm və innovativ biznes sahələrində liderliyinə də təhlükə yarada bilər. Tramp 2025-ci ildə yenidən vəzifəyə qayıtdıqdan sonra deportasiya praktikasının genişləndirilməsi, vizaların ləğvi, sərhədlərin bağlanması və bəzi immiqrant kateqoriyaları üçün müdafiə mexanizmlərinin aradan qaldırılması kimi sərt tədbirlər tətbiq edib.