Azərbaycanda həkimlər məcburi xidmətə göndərilə bilər

Bu gün bütövlükdə götürəndə səhiyyə sistemində bizim əsas problemimiz bölgələrdə lazımi kadrlarımızın olmamasıdır.

Bunu milli.az-a açıqlamasında Milli Məclisin Səhiyyə komitəsinin sədr müavini Musa Quliyev deyib.

Millət vəkilinin sözlərinə görə, bu problemi aradan qaldırmağın çox sadə yolu var: "Hökumət rezidenturaya qəbul olunan hər bir şəxslə müqavilə bağlamalıdır ki, o, rezidentura təhsilindən sonra 1, 2 və ya 3 il rayonlardan birində xalqa xidmət etməlidir. Bu, tam normal məcburi xidmət proqramı ola bilər. Dar ixtisasa yiyələnmiş yüksək səviyyəli həkim gedib bölgələrdə həmin işi qura bilər və o sahəni qaldıra bilər. Vaxtı bitdikdən sonra isə istəsə, yenə də orada qalıb işinə davam edə və ya yerini digərinə təhvil verib istədiyi yerə gedə bilər. Yəni bu sistem işə düşəndən sonra bizim bölgələrdə də həkim çatışmazlığı problemimiz olmayacaq".

BAKU.WS