Şoyqudan Qarabağda yeni müharibə xəbərdarlığı

"Mərkəzi Asiya və Cənubi Qafqazda yeni hərbi münaqişələrin yaranması ehtimalı qalır”.

ANS PRESS-in məlumatına görə, bu sözləri  Rusiyanın müdafiə naziri Sergey Şoyqu Suriyanın Silahlı Qüvvələrinə həsr olunan konfransda deyib. Şoyqu sözlərini dünyada baş verən hadisələrin inkişafı ilə əsaslandırıb. Rusiya rəsmisi münaqişələrin Suriyadakı müharibədən qaynaqlana biləcəyini deyib.

Şoyqu deyib ki, Rusiyanın Müdafiə Nazirliyi Suriya ordusunun döyüş bacarığının  bərpa edilməsi üçün təlimlər təşkil edir.

"Bu şərtlər altında Rusiya potensial təhdidlərə qarşı adekvat reaksiya verməyə məcbur olacaq”, - deyə Rusiya rəsmisi bildirib. 

Mərkəzi Asiyada qaynar münaqişə zonası olmasa da müxtəlif dövrlərdə  Özbəkistan və Qırğızıstan arasında gərginliklər yaşanıb.

Həmçinin Mərkəzi Asiyada gələcək dövrlərdə su qıtlığının olacağı ehtimal edilir. Ona görə də ölkələrin bir-birinə qarşı "su müharibəsi” elan etməsi ehtimal edilə bilər. 

Mərkəzi Asiyadan fərqli olaraq  Cənubi Qafqazda Gürcüstan-Abxaziya, Gürcüstan-Osetiya və Ermənistan-Azərbaycan Dağlıq Qarabağ münaqişələri var.

Həmçinin Rusiya və Gürcüstan arasında 2008-ci ildə genişmiqyaslı silahlı toqquşma baş verib. Hazırda Cənubi Qafqazda ən qaynar münaqişə zonası Dağlıq Qarabağdır. Çünki Ermənistan qoşunları hələ də Azərbaycan torpaqlarında qalmaqdadır. Bu isə hər an yeni müharibənin başlana biləcəyini deməyə əsas verir. 

BAKU.WS