Bakı–Ağdam marşrutu Xankəndiyə uzadılacaq

Azərbaycan Dəmir Yolları üzrə həyata keçirilən inkişaf layihələri çərçivəsində Bakı–Ağdam sərnişin marşrutunun gələcəkdə Xankəndiyə qədər uzadılması planlaşdırılır. Yeni qatarların istifadəyə verilməsi gələn ilin sonuna nəzərdə tutulub və bu, əlavə dayanacaqların yaradılmasına səbəb olacaq.

Nəqliyyat üzrə ekspert Rauf Ağamirzəyev BAKU.WS-ə bildirib ki, gələcəkdə marşrutda Əsgəran, Xocalı və Xankəndi stansiyaları fəaliyyət göstərəcək. Digər istiqamətlərdə – Horadiz–Ağbənd dəmir yolu layihəsi də icra olunur və gələn il tamamlanması gözlənilir. Əlavə olaraq, Mincivan istiqamətində də reyslərin açılması planlaşdırılır ki, bu da mobillik və əlçatanlığı artıracaq.

Ekspert həmçinin Stadler markalı qatarların üstünlüklərinə toxunub. Qeyd edib ki, qatarlar sərnişinlər üçün komfortlu və inklüzivdir. Hazırda Azərbaycanda iki mərtəbəli Stadler KISS və bir mərtəbəli FLIRT qatarları fəaliyyət göstərir. Yeni sifarişlə 20 qatarın alınması gözlənilir. Bununla bağlı dayanacaq stansiyalarda platformaların yenidən qurulması işləri aparılır.

Rauf Ağamirzəyev bildirdi ki, dəmir yolunun elektrikləşdirilməsi sahəsində də mühüm işlər görülür. Hacıqabul–Ucar mənzilləri arasında dəyişən cərəyana keçid təmin edilib ki, bu da yük daşımalarında xərclərin azalması və hərəkətin sürətlənməsini təmin edir. Növbəti mərhələdə Bakı–Hacıqabul və Abşeron dairəvi istiqamətlərində də dəyişən cərəyana keçid nəzərdə tutulur. Eyni zamanda rabitə və işarəvermə sistemlərinin modernləşdirilməsi davam etdirilir.

Şahanə Xankişiyeva