Meta süni intellekt yatırımları üçün işçilərini ixtisar edəcək

Meta şirkəti 2025-ci il üçün böyük planlar hazırlayıb və bu çərçivədə məhsullarında əhəmiyyətli yeniliklər və təkmilləşdirmələr həyata keçirməyi planlaşdırır. Lakin bu məqsədə çatmaq üçün ilk addımlardan biri işçi heyətinin 5%-nin ixtisarı olacaq.

BAKU.WS xəbər verir ki, şirkətin qurucusu və baş direktoru Mark Zukerberq aşağı performans göstərən işçilərin işdən çıxarılacağını açıqlayıb.

Bloomberg-in məlumatına görə, Meta aşağı performans göstərən işçiləri müəyyənləşdirərək 3,600 nəfəri işdən çıxarmağı planlaşdırır. Şirkət, 2025-ci ildə süni intellekt sahəsində irəliləyişlərə nail olmaq üçün bu addımı atmağı zəruri hesab edir.

İşdən çıxarılan işçilər əvvəlcə ətraflı qiymətləndirmədən keçiriləcək və onlara uyğun kompensasiya təmin ediləcək.

Meta, süni intellekt layihələrini inkişaf etdirmək məqsədilə mövcud işçi heyətini azaltmağı və bu sahədə yeni mütəxəssisləri işə götürməyi planlaşdırır. 2024-cü ildə şirkət istifadəçi təcrübəsini artıran "Meta AI" texnologiyasını təqdim edib və bu texnologiyanı 500 milyon istifadəçiyə təqdim edib.

Meta AI texnologiyasına əsaslanan yeni bir axtarış sistemi hazırlamağı və bu sistemi 2025-ci ildə istifadəçilərə təqdim etməyi hədəfləyir.