Jurnalistin ölümündə adı hallanan futbolçu: “Bizə düşmən lazım deyil”

Jurnalistin ölümündə günahlandırılan "Qəbələ"nin futbolçusu Cavid Hüseynov baş verənlərə münasibət bildirib.

BAKU.WS-in məlumatına görə, futbolçu özünün şəxsi Facebook səhifəsində  günahsız olduğunu deyib:

"Allahdan jurnalist Rasim Əliyevə rəhmət diləyirəm. Ruhu şad olsun. Çoxları məni tənqid edir ki sənin dostların öldürüb onu. Amma yox, bu, belə deyil. Mən heç kimə imkan vermərəm ki, mənə görə kimisə öldürsünlər. O jurnalistlə Facebook-da kiprli jurnalistlə olan müsahibəyə aydınlıq gətirmişik, amma normal şəkildə. Sonra da mehribancasına sağollaşmışıq. İndi isə hamı az qala mənə qatil adı verir. Nə oldu, mən həmin Cavidəm də, bir neçə gün əvvəl dilinizdən düşməyən. Sizcə, mən bu cür hərəkət edərəm? 

Bir misal gətirmək istəyirəm. Araz Abdullayev maşını ilə adam vurdu, jurnalistlər ona qatil damğası vurdular. İndi isə mənim günahım olmaya-olmaya məni ləkələmək istəyirlər. Bizə düşmən lazım deyil vallah. Adamın başının üstündə Allah var. Yazanda haqqına yazın. Çox təəssüflər olsun ki, haqqına yazan jurnalistlərimiz çox azdır". 

Qeyd edək ki, ötən gün xəstəxanaya yerləşdirilən jurnalist Rasim Əliyev orada dünyasını dəyişib. Furnalistin avqustun 8-də "Qəbələ"nin futbolçusu Cavid Hüseynovun qohumları tərəfindən döyüldüyünü iddia edilir. 

Azad Əliyev

BAKU.WS