Türkiyədə DƏHŞƏT: Üç kənddə silahlı hücum, 9 nəfər öldürüldü

Türkiyənin Afyonkarahisar vilayətinin İhsaniye rayonunda bir neçə kəndi əhatə edən silahlı hücumlar ölkədə ciddi narahatlıq yaradıb. Müxtəlif ərazilərdə baş verən hadisələr nəticəsində 9 nəfər həyatını itirib. Hücumları törətməkdə şübhəli bilinən şəxsin saxlanılması üçün genişmiqyaslı əməliyyat başladılıb.

BAKU.WS-in Türkiyə mətbuatına istinadən verdiyi məlumata görə, hadisələr noyabrın 5-də İhsaniye rayonunun Ayazini, Kıyır və Yukarıtandır kəndləri ərazisində baş verib.

"Anadolu" Agentliyinin (AA) məlumatına əsasən, Ayazini kəndi yaxınlığında 3 nəfər, Kıyır kəndi ərazisində isə 3 nəfər silahla vurularaq öldürülüb. Yukarıtandır kəndində yaralı vəziyyətdə aşkarlanan iki qadın isə xəstəxanaya çatdırılsa da, həkimlərin müdaxiləsinə baxmayaraq onların həyatını xilas etmək mümkün olmayıb. Beləliklə, hadisələr nəticəsində ölənlərin sayı 9-a çatıb.

#SONDURUM | Köy köy gezip katliam yaptı! 📌Afyonkarahisar'da bir kişinin gerçekleştirdiği silahlı saldırılarda 9 kişi hayatını kaybetti. Saldırganın henüz yakalanamadığı olayın ardından köylere giriş ve çıkışlar kapatıldı. 📌Can kaybının daha yüksek olabileceği yönünde iddialar gündeme gelirken, konuya ilişkin henüz resmi bir açıklama yapılmadı. 🎙️A Haber muhabiri Ata Gündüz Kurşun @atagunduzkursun, bölgedeki son gelişmeleri aktardı.

— A Haber (@ahaber) November 5, 2026

Hücumlar üç kənddə baş verib

Türkiyə mediasının yaydığı ilkin məlumatlara görə, hadisə ilə bağlı 112 Təcili Çağrı Mərkəzinə silahlı yaralanma barədə məlumat daxil olub. Bundan sonra əraziyə jandarma və tibbi yardım qrupları göndərilib.

Araşdırmalar zamanı Ayazini və Kıyır kəndləri yaxınlığında müxtəlif avtomobillərdə güllələnmiş şəxslərin meyitləri aşkarlanıb. Digər hadisə isə Yukarıtandır kəndində qeydə alınıb. Burada yaralı vəziyyətdə tapılan qadınlar xəstəxanaya aparılsa da, ikisi vəfat edib.

Mətbuatda yayılan məlumatlarda hücumların tüfənglə, o cümlədən pompalı tüfəngdən istifadə edilməklə törədildiyi bildirilir.

Şübhəli qırmızı rəngli avtomobillə qaçıb

Hadisə ilə bağlı diqqət çəkən məqamlardan biri şübhəlinin qaçış istiqamətidir.

Türkiyə mətbuatında yer alan məlumatlara görə, hücumları törətməkdə şübhəli bilinən şəxs qırmızı rəngli yüngül kommersiya avtomobili ilə hadisə yerlərindən uzaqlaşıb. Onun Kütahya istiqamətində hərəkət etdiyi ehtimal olunur.

Bu səbəbdən Afyonkarahisarla yanaşı, ətraf ərazilərdə də təhlükəsizlik tədbirləri gücləndirilib. Jandarma hadisələrin baş verdiyi kəndlərə gedən yolları nəzarətə götürüb, polis və digər təhlükəsizlik qüvvələri şübhəlinin tapılması üçün əməliyyat-axtarış tədbirlərini davam etdirir.

Hazırda hücumların hansı səbəbdən törədildiyi, şübhəlinin öldürülən şəxslərlə münasibətinin olub-olmadığı və hadisələrin əvvəlcədən planlaşdırılıb-planlaşdırılmadığı barədə təsdiqlənmiş rəsmi məlumat yoxdur.

Ölənlərin kimliyi araşdırılır

Hadisə ilə bağlı cinayət işi üzrə araşdırmalar davam edir. Həlak olan şəxslərin kimliklərinin müəyyənləşdirilməsi, hücumların dəqiq ardıcıllığının və motivinin üzə çıxarılması istiqamətində iş aparılır.

Qeyd edək ki, hadisə ilə bağlı gün ərzində yayılan ilkin xəbərlərdə ölənlərin sayı 5, daha sonra 7 nəfər göstərilib. Anadolu Agentliyinin yenilənmiş məlumatında isə ölüm sayının 8-ə yüksəldiyi təsdiqlənib. Noyabrın 5-i axşam saatlarına olan son məlumata görə, İhsaniye rayonundakı silahlı hücumların qurbanı 8 nəfərdir.