Diplom üçün tələbələrdən rüşvət aldığı iddia edilən müəllim QOVULDU

Rüşvət aldığı iddia edilən müəllim işdən azad edilib.

BAKU.WS Gencexeber.az-a istinadən xəbər verir ki, bu barədə Gəncə Dövlət Universitetinin (GDU) Mətbuat Xidmətindən məlumat verilib.

Bildirilib ki, GDU-nun Tələbələrin Qeydiyyatı və Dövlət Nümunəli Sənədlərlə İş Sektorunun müdiri Qüdrət İlyas oğlu Verdiyev işində verdiyi ciddi nöqsanlara görə 30 sentyabr 2024-cü il tarixdə tutduğu vəzifədən azad olunub.

Xatırladaq ki, ötən gün sosial şəbəkələrdə GDU-da diplom almaq üçün tələbələrdən rüşvət tələb olunduğu iddia edilib və müvafiq videogörüntülər yayılıb. Qüdrət adlı müəllim diplomları təqdim etmək üçün tələbələrdən 10 manat məbləğində pul istəyib.

Səbəb olaraq isə, rüsum ödənilməsini göstərib. Hətta tələbə iddia edir ki, praktika üçün 250 manat yığılıb.