Bakıda evlərin sökülməsi gərginlik yaradır: Kiçik mülk sahibləri böyük mənzil tələb edirlər

Bakıda köhnə evlərin sökülməsi zamanı problemlər daha çox sahəsi kiçik olan evlərin sahibləri ilə bağlı yaranır.

Mülk sahibləri kiçik evlərinin əvəzinə böyük mənzil tələb edir, tikinti şirkətləri isə bunun mümkün olmadığını bildirirlər.

Nəticədə, tərəflər arasında mübahisələr yaranır, bəzi hallarda məsələ məhkəməyə qədər gedib çıxır. Bu problem isə illərdir həllini gözləyir.

Sakinlərdən biri vəziyyəti belə izah edib: "Razılaşa bilmirik. İstədiyimizi vermirlər. Evimi də zədələyiblər. Yenə razılaşmırlar, bizi aldadırlar. Evimin arxa hissəsini söküblər, altı su içində qalıb. 11 ailə qalmışıq, amma məsələni həll etmirlər".

Daşınmaz əmlak üzrə ekspert Elnur Azadov Baku TV-yə bildirib ki, pilot layihələrin həyata keçirilməsi ilə bağlı Nazirlər Kabinetinin 86 saylı qərarında kompensasiya sahəsinə əlavə 15-20 faiz tətbiqi nəzərdə tutulur.

Lakin ölkədə kompensasiyaların verilməsi ilə bağlı alternativ qanun və ya normativ mexanizm olmadığı üçün vətəndaşlarla söküntü işlərini aparan tərəflər arasında tez-tez mübahisələr yaranır.

Ekspertin sözlərinə görə, əsas problemlərdən biri kiçik istifadə sahəsinə görə verilən kompensasiyalarla bağlıdır.

Əgər tikinti şirkəti kompensasiyanı mənzil və ya əmlak formasında təqdim edirsə, bu zaman fərqli əmsalların tətbiqi vacibdir.

"Hazırda bu məsələni tənzimləyən konkret qanun yoxdur. Bu səbəbdən ən azı Nazirlər Kabinetinin müəyyən etdiyi 15-20 faiz əlavə kompensasiya əvəzinə diferensial yanaşma tətbiq olunması daha məqsədəuyğun olardı. Məsələn, sahəsi 20 kvadratmetrə qədər olan evlər üçün kompensasiya ən azı 30 faiz artırıla bilər. 20-30 kvadratmetr arası sahələr üçün isə ən azı 25 faiz əlavə kompensasiya tətbiq edilməsi daha ədalətli olar", - deyə Elnur Azadov qeyd edib.