Gəncədə xüsusi əməliyyat: Daxili Qoşunlar məscidi mühasirəyə alıb (VİDEO)

Bu gün günorta saatlarında Gəncədəki Şah Abbas məscidində dindarların kütləvi saxlanılması ilə müşaiyət olunan əməliyyat keçirilib.

BAKU.WS-in məlumatına görə, şəhər sakinlərindən virtualaz.org saytına daxil olan xəbərlərə görə, polis və xüsusi təyinatlılar məscidə basqın edərək cümə namazını qadağan ediblər. Bir qrup dindar saxlanılıb. Onlardan bir neçəsi daha sonra buraxılıb. Buraxılan dindarların bildirdiyinə görə, onlara deyiblər ki, məsciddə namazı Şeyxülislam Allahşükür Paşazadə qadağan edib. İslamazeri.az saytı isə yazır ki, bu gün səhər saatlarında Şah Abbas məscidindən İmamzadə İbrahimə qədər əzadarlıq yürüşü keçirmək istəyən gəncəlilərə polis müdaxilə edib. Məscid polis və Daxili Qoşunlar tərəfindən mühasirəyə alınıb, məscidin yanına su şırnaqları gətirilib. Camaat məscidə yaxın buraxılmayıb. Mənbənin sayta verdiyi xəbərə görə, hazırda məscidlər bağlıdır və Gəncə dindarlarına 2 gün ardıcıl (bu gün və sabah) məscidlərin qapılarının bağlı olacağı bildirilib. Yürüşün qarşısı alınarkən Gəncə sakinlərinə güc tətbiq edilib, məscidin yanı və ətraf küçələrdə qan izləri hələ də qalmaqdadır. Yürüşün qarşısı alınan zaman 50-yə yaxın dindar həbs olunsa da son məlumatlara görə, bəziləri buraxılıb və hazırda 26 nəfər dindar nəzarət altında saxlanılır. Həbs olunanlar arasında ilahiyyatçı, Kərbəlayi Musa da var.

Məlumatı verən mənbə bildirir ki, saxlanılanlar axşam saatlarına qədər buraxılmasa polis bölməsinə doğru yürüş keçiriləcək.

Məsələyə aydınlıq gətirmək üçün Daxili İşlər Nazirliyilə əlaqə saxladıq. Nazirliyin rəis müavini Ehsan Zahidov BAKU.WS-ə açıqlamasında bildirdi ki, bu barədə onlara heç bir informasiya gəlməyib. Hansısa məlumat daxil olarsa, o zaman kütləvi informasiya vasitələrinə rəsmi açıqlama veriləcək. Allahşükür Paşazadənin məsciddə namaz qılmağı qadağan etməsilə bağlı məsələyə isə mövqe öyrənmək üçün quruml əlaqə saxlamağa çalışdıq. Qafqaz Müsəlmanları İdarəsinin Beynəlxalq əlaqələr şöbəsinin müdiri Müqəddəs Payızov BAKU.WS-ə açıqlamasında bu məsələnin onun səlahiyyətləri kənarında olduğunu bildirdi.

"Mümkünsə Rəhimə Dadaşova ilə əlaqə saxlayın. Rəhimə xanım bütün qaranlıq məsələlərə aydınlıq gətirəcək”, - deyə Müqəddəs Payızov bildiridi. Rəhimə Dadaşova isə telefon zənglərimizə cavab vermədi və sonradan mobil telefonun söndürdü.