Bakıda evlərə soxulan maskalı cinayətkar qrup ifşa olundu

Bakıda mənzillərə girərək, vətəndaşları döyüb, təhqir edən və talayan cinayətkar dəstə üzvləri zərərsizləşdirilib.

Bakı şəhər Baş Polis İdarəsindən BAKU.WS-ə verilən məlumata görə, əməliyyat Cinayət Axtarış İdarəsi, Xəzər rayon Polis İdarəsi Cinayət Axtarış Şöbəsi və 1-ci polis bölməsi əməkdaşları tərəfindən keçirilib. Keçirilən əməliyyat-axtarış tədbirləri nəticəsində, sentyabrın 1-də saat 12:20 radələrində H.Z.Tağıyev küçəsində yeni yaşayş sahəsində yaşayan 1946-cı il təvəllüdlü Nelli Seyfullayevanın evinə maskalanaraq açıq qapıdan daxil olmaqla, onun əl-qolunu bağlayıb 1000 manat pulunu və mobil telefonunu quldurluq yolu ilə talamaqda şübhəli bilinən şəxslər müəyyənləşib.

Əməliyyat nəticəsində Sabirabad rayon sakini, 1983-cü il təvəllüdlü İlham Zakir oğlu Abbasov, Abşeron rayon sakini, 1986-cı il təvəllüdlü Əli Xanəli oğlu Quliyev və Lənkaran rayon sakini, 1985-ci il təvəllüdlü Teyyub Əhmədulla oğlu Teymurov tutulub. Şübhəli şəxslər ətrafında, əməliyyat-axtarış, istintaq tədbirləri davam etdirilir. Ziya Səccad BAKU.WS