Azərbaycanda "bura əxlaqsızlıq yuvasıdır" deyən jurnalistlər tutuldu

Biləsuvar rayonunda jurnalistlər saxlanılıb.

Daxili İşlər Nazirliyinin mətbuat xidmətindən BAKU.WS-ə verilən məlumata görə, Biləsuvar rayonunun Bəydili kənd sakini Leyli Xudaverdiyeva RPŞ-yə müraciət edərək həmin gün "Tərəqqi TV" informasiya agentliyinin baş redaktoru Aygün Həsənovanın, redaktor müavini Nahid Babayevin və müxbir Elmir Əsgərovun Xırmandalı kəndində ona məxsus yeməkxanaya gəldiklərini, obyektdə əxlaqsızlıq yuvasının olduğunu iddia edərək bununla bağlı videoçəkiliş apardıqlarını və görüntünü sosial şəbəkədə yayacaqları ilə hədələyərək ondan 500 manat pul tələb etdiklərini bildirib.

Biləsuvar RPŞ əməkdaşlarının həyata keçirdikləri əməliyyat-axtarış tədbirləri nəticəsində adları çəkilən şəxslər noyabrın 14-də L.Xudaverdiyevadan 200 manat pul alarkən tutulublar.

Ətraflarında aparılmış əməliyyat tədbirləri ilə onların noyabrın 12-də rayonun Arazbarı kəndində kənd sakini Əli Quliyevə və Hacırüstəmxanlı kəndində İmişli rayon sakini Fazilə Səfərovaya məxsus yeməxanalara da gələrək eyni üsulla Ə.Quliyevdən 100 manat pul aldıqları, F.Səfərovadan isə 500 manat tələb etdikləri müəyyənləşdirilib.

RPŞ tərəfindən araşdırma aparılır.

İlyas Quliyev

BAKU.WS