Uşaqlıq dostları DNT testi ilə bacı olduqlarını öyrəniblər

Hindistanda uşaq evlərinə verilən və daha sonra Niderlandda fərqli himayədar ailələr tərəfindən övladlığa götürülən iki qadın illər sonra bioloji bacı olduqlarını öyrəniblər.

BAKU.WS xarici mediaya istinadən xəbər verir ki, 43 yaşlı Meena Geltink və 44 yaşlı Minal Tijssen bir-birindən xəbərsiz şəkildə Niderlandın müxtəlif şəhərlərində böyüyüblər. Onlar 1996-cı ildə övladlığa götürülmüş uşaqlar üçün keçirilən tədbirdə tanış olublar.

Fiziki oxşarlıqları və aralarındakı güclü bağ səbəbilə yaxın dost olan Meena və Minal bir-birlərinə zarafatla "bacı" deyə müraciət ediblər. Lakin sonradan əlaqələri kəsilib və 15 il ərzində görüşməyiblər.

Bu ilin aprelində keçirilən DNT testi nəticəsində onların bioloji bacı olduğu 100 faiz uyğunluqla təsdiqlənib.

Minal telefonuna gələn bildirişdə "bacı" sözünü gördükdə böyük təəccüb yaşadığını bildirib. Daha sonra sosial şəbəkələrdəki fotolardan bacısının illər əvvəlki uşaqlıq dostu Meena olduğunu müəyyənləşdirib.

Meena isə görüşdən sonra özünü "evindəki kimi" hiss etdiyini deyib. Bacılar həqiqəti öyrəndikləri gündən etibarən hər gün əlaqə saxlayırlar.