Bakıda su aparatlarını sındıraraq pulları OĞURLADILAR

Bakıda bir neçə ünvanda avtomatlaşdırılmış su aparatlarını sındıraraq pul vəsaitləri və avadanlıqlar oğurlanıb.

Bu barədə BAKU.WS-in "qaynar xətti"nə məlumat daxil olub.

Məlumata görə, su şirkətlərdən birinin aparatlarına qarşı soyğunçuluq hadisəsi oktyabrın 10-da Nəsimi rayonu, Asif Məhərrəmov küçəsi 113 ünvanında qeydə alınıb. Naməlum şəxslər su aparatının qapısını və kilidlərini sındıraraq içərisindəki pul vəsaitini götürüb.

Eyni zamanda oktyabrın 22-də şirkətin Nizami, Nəsimi, Binəqədi və Yasamal rayonlarında yerləşən digər su aparatlarına da qanunsuz müdaxilə olunub, aparatların qapıları, kilidləri və digər mühafizə elementləri güc tətbiq edilməklə sındırılıb. Həmçinin aparatların daxilində olan pul vəsaitləri, o cümlədən pul vəsaitlərinin qəbulu və saxlanılması üçün istifadə olunan avadanlıqlar oğurlanıb.

Hadisələrlə bağlı Daxili İşlər Nazirliyinin 102 xidmətinə məlumat verildiyi və polis orqanlarına müraciət olunduğu bildirilib. Hazırda faktlarla bağlı araşdırma aparılır.