Suriyanın ən böyük həbsxanası muzeyə çevriləcək

Suriyanın silahlı müxalifət lideri Əbu Məhəmməd əl-Culani Dəməşq yaxınlığında yerləşən "Seydnaya" həbsxanasını muzeyə çevirmək planlarını açıqlayıb.

Bu barədə RIA Novosti məlumat yayıb.

Əl-Culani bildirib ki, həbsxana məhbuslarının işgəncələrində iştirak edən hər kəs ədalət qarşısında cavab verməlidir.

Müxalifətin Dəməşqdə hakimiyyəti ələ keçirməsindən sonra minlərlə insan Suriyanın müxtəlif həbsxanalarından azad edilib. Əl-Culani əlavə edib ki, həbs olunanların əksəriyyəti qanunsuz şəkildə saxlanılıb, işgəncə və zorakılıqlara məruz qalıb.

"Seydnaya" həbsxanası Dəməşqin şimal-şərqində yerləşən, Suriyanın ən tanınmış və iri həbsxanalarından biridir. Son günlər minlərlə suriyalı həbsxananın divarları önünə toplaşaraq, yaxınlarının taleyi ilə bağlı məlumat almağa çalışır.