Sudanda vəba epidemiyası: ölənlərin sayı 1258-ə çatıb

Sudanda vəba epidemiyası ölüm saçmağa davam edir.

BAKU.WS xəbər verir ki, Sudan Səhiyyə Nazirliyinin verdiyi məlumata görə, xəstəliyə yoluxanların sayı 48 min 598-ə, ölənlərin sayı isə 1258-ə yüksəlib.

Sudanda iyun ayında başlayan güclü yağışlar və daşqınlar vəba xəstəliyinin yayılmasına səbəb olub. Sudan hakimiyyəti avqustun 12-də ölkədə vəbanı rəsmi olaraq epidemiya elan edib.

Birləşmiş Millətlər Təşkilatının Humanitar Məsələlər üzrə Koordinasiya Ofisi oktyabrın 1-də yayımladığı hesabatda, 3,4 milyon sudanlı uşağın vəba xəstəliyinə yoluxma riski altında olduğunu qeyd edib. BMT-nin Uşaq Fondu (UNICEF) isə oktyabrın 5-də Sudana 1,4 milyon doza vəba peyvəndi göndərildiyini açıqlayıb.

Ölkədə davam edən müharibə və səhiyyə sisteminin qeyri-effektivliyi epidemik xəstəliklərin sürətlə yayılmasına səbəb olur. Bu vəziyyət əhalinin həyatını daha da çətinləşdirir və beynəlxalq dəstəyə olan ehtiyacı artırır.