Putin-Uitkoff görüşü 4 saatdan çox çəkdi: hansı qərarlar qəbul olundu?

Rusiya Prezidenti Vladimir Putin Moskvada ABŞ prezidentinin xüsusi nümayəndəsi Stiv Uitkoff və tanınmış sahibkar Cared Kuşnerlə uzunmüddətli görüş keçirib.

BAKU.WS xəbər verir ki, təxminən dörd saat davam edən danışıqlar barədə məlumatı Kremlin rəsmisi Yuri Uşakov verib.

Görüş zamanı amerikalı nümayəndələr Putini ABŞ və Ukrayna liderlərinin Davosda baş tutan təmasları ilə bağlı məlumatlandırıblar.

Danışıqların əsas nəticələrindən biri yanvarın 23-də Əbu-Dabidə təhlükəsizlik mövzularına həsr olunmuş Rusiya-ABŞ-Ukrayna formatında üçtərəfli işçi qrupunun toplantısının keçirilməsi barədə razılıq olub. Bildirilib ki, Rusiya nümayəndə heyətinə Baş Kəşfiyyat İdarəsinin rəhbəri İqor Kostyukov rəhbərlik edəcək.

Eyni zamanda, Stiv Uitkoffun Əbu-Dabidə Rusiya prezidentinin xüsusi nümayəndəsi Kirill Dmitriyevlə ayrıca görüş planlaşdırdığı da açıqlanıb.

Kremldə keçirilən müzakirələrdə yalnız Ukrayna məsələsi ilə kifayətlənməyərək, Sülh Şurasının fəaliyyəti, Qrenlandiya ətrafındakı proseslər və digər beynəlxalq mövzular da gündəmə gətirilib.

Yuri Uşakovun sözlərinə görə, Moskva Ukrayna münaqişəsində ərazi məsələləri razılaşdırılmadan davamlı sülhün mümkün olmadığını düşünür və bu istiqamətdə anlaşma əldə olunmayacağı təqdirdə hərbi əməliyyatların davam edəcəyini açıq şəkildə bəyan edib.

Buna baxmayaraq, Kremlin nümayəndəsi görüşü həm Rusiya, həm də ABŞ üçün ümumilikdə faydalı və konstruktiv qiymətləndirib.