İstanbullular yeraltı təkanlar səbəbilə gecələri çadırlarda keçirirlər

İstanbulda son günlərdə baş verən zəlzələlər şəhər əhalisində ciddi təşviş yaradıb. Yeraltı təkanların davam edəcəyi qorxusu ilə sakinlər gecəni şəhər parklarında qurulan çadırlarda keçirməyə başlayıblar.

BAKU.WS xəbər verir ki, bu barədə Shot məlumat yayıb.

Məlumata görə, son günlər ərzində İstanbulda 300-ə yaxın yeraltı təkan qeydə alınıb. Onlardan sonuncusu – 3,7 bal gücündə olan zəlzələ bu gün səhər saatlarında baş verib. Yerli hakimiyyət orqanları təcili olaraq sakinlərin yerləşdiyi çadır düşərgələrini içməli su və ərzaqla təmin edir.

Qeyd edək ki, aprelin 23-də Türkiyədə 6,2 bal gücündə zəlzələ baş verib. Şahidlərin sözlərinə görə, insanlar panikaya düşüb, rabitə əlaqələri kəsilib. Türkiyənin Fövqəladə Hallar Agentliyinin məlumatına əsasən, zəlzələ zamanı 30 min ton trotil partlayışına bərabər enerji sərbəst buraxılıb.