İlon Maskın qrupu ABŞ-nin ödəniş sistemlərinə giriş əldə etməyə çalışıb

İlon Maskın "Hökumətin Effektivliyi Departamenti" (DOGE) ilə əlaqəli şəxslər ABŞ hökumətinin sosial təminat və vergi geri qaytarmaları kimi funksiyaları yerinə yetirən ödəniş sistemlərinə giriş əldə etməyə cəhd göstəriblər.

BAKU.WS Ferra.ru-ya istinadən xəbər verir ki, bu sistem ABŞ-nin Fiskal Xidməti Bürosu tərəfindən idarə olunur və ötən il 5 trilyon dollardan çox ödəniş həyata keçirib.

DOGE-nin bu sistemə giriş əldə etməyə niyə çalışdığı hələlik məlum deyil. Lakin mütəxəssislər bunun hökumətin əsas funksiyalarına müdaxilə riski yaratmasından narahatdırlar. Qeyd edək ki, DOGE rəsmi dövlət qurumu deyil, lakin Donald Trampın fərmanı əsasında yaradılıb. Buna baxmayaraq, Mask bu qurumu real səlahiyyətlərə malik bir struktur kimi qəbul edir, hətta Ağ Ev yaxınlığında ofis açıb və hökumət binalarında sərbəst şəkildə hərəkət edir.

Bu addımın dəqiq səbəbi bilinməsə də, bəzi mənbələr bunun Maskın Visa ilə yeni tərəfdaşlıq çərçivəsində X platformasında ödəniş xidmətləri göstərmək planı ilə əlaqəli ola biləcəyini irəli sürürlər.