Ermitajda imperator taxtına oturan şəxs saxlanıldı

Sankt-Peterburqdakı Dövlət Ermitaj Muzeyində ziyarətçilərdən biri təhlükəsizlik qaydalarını pozaraq muzey eksponatına yaxınlaşıb və imperator taxtında əyləşib.

BAKU,WS-in məlumatına görə, hadisə mayın 17-də günorta saatlarında Georgi zalında baş verib.

Bildirilir ki, kişi qoruyucu kəndiri keçərək Böyük imperator taxtına oturub. Muzey əməkdaşı onu uzaqlaşdırmağa cəhd etsə də, qayda pozucusu üzərində olan iki bıçağı göstərib. Bundan sonra mühafizəçi geri çəkilmək məcburiyyətində qalıb.

Hadisə ilə bağlı dərhal Ermitajın təhlükəsizliyinə cavabdeh olan Rusiya qvardiyasına məlumat verilib. Hüquq-mühafizə orqanlarının əməkdaşları kişini saxlayarkən onun müqavimət göstərdiyi qeyd olunub.