Avstraliyalı alimlər açıqladı: Bu xərçəng hüceyrəsini bir saata məhv edir

Xərçəng hər il milyonlarla insanı səssizcə məhv edir. Hüceyrələrin aqressiv böyüməsi ilkin mərhələdə heç bir iz qoymur, onlar görünən zaman isə geri dönüşü olmayan mərhələyə çatmış olur.

BAKU.WS xəbər verir ki, elm adamları uzun illərdir xərçəngin müalicəsi üçün tədqiqatlar aparırlar. Avstraliyalı alimlər bu dəfə aşkar ediblər ki, bal arılarından alınan zəhər süd vəzi xərçəngini məhv edir.

Zəhərin tərkibindəki melittin maddəsi üçqat mənfi və HER2 müsbət olmaqla müalicəsi çətin olan iki növ süd vəzi xərçənginə qarşı sınaqdan keçirilib. Bu kəşf həyəcanverici olsa da, alimlər daha çox iş görülməli olduğunu deyirlər. Süd vəzi xərçəngi bütün dünyada qadınlarda ən çox rast gəlinən xərçəng növüdür.

Belə bir irəliləyiş Harry Perkins Tibbi Araşdırmalar İnstitutu və Qərbi Avstraliya Universitetinin tədqiqatçıları tərəfindən həyata keçirilib.

Araşdırma beynəlxalq "NPJ Nature Precision Oncology" jurnalında dərc edilib.

Tədqiqatlar göstərir ki, melittin xərçəng hüceyrələrinin membranlarını 60 dəqiqə ərzində məhv edə bilir. Melittin, yalnız 20 dəqiqə ərzində xərçəng hüceyrələrinin böyüməsi və bölünməsi üçün lazım olan kimyəvi maddələri azaltmağı bacarır.

Melittin bal arısı zəhərinin əsas tərkib hissəsidir və ağırlığının təxminən 50% -ni təşkil edir. Bu iltihab əleyhinə, antiviral və antimikrobial xüsusiyyətləri ilə tanınır.

Melittin hüceyrə membranlarını parçalayaraq fəaliyyət göstərir. Bu da onu elmi tədqiqatlarda, xüsusən də xərçəng hüceyrələrini hədəf alaraq öldürə biləcəyi üçün xərçəng müalicəsində faydalı edir.