Avropada ölümcül "ət yeyən" bakteriya yayılır

Avropada ölümcül infeksiyalara səbəb olan "Vibrio vulnificus" bakteriyasının yayılma riski artıb.

BAKU.WS xəbər verir ki, bu barədə "Metro" nəşri Avropa Xəstəliklərin Qarşısının Alınması və Nəzarəti Mərkəzinə (ECDC) istinadən məlumat yayıb.

Bildirilib ki, "ət yeyən bakteriya" kimi tanınan "Vibrio vulnificus" nekrotik fassiit adlanan ağır infeksiyaya səbəb olur. Xəstəlik toxumaların sürətlə məhvinə gətirib çıxarır və bəzi hallarda xəstənin həyatını xilas etmək üçün ətrafların amputasiyası zəruri olur. Bakteriya qana keçdikdə isə sepsis inkişaf etdirə bilər ki, bu da ölüm riski yaradır.

Mütəxəssislərin sözlərinə görə, bakteriya əsasən isti və duzluluq səviyyəsi aşağı olan çay mənsəblərində və laqunlarda daha sürətlə çoxalır.

Qeyd edilir ki, əvvəllər Aralıq dənizinin yüksək duzluluğu bu bakteriyanın yayılmasının qarşısını alırdı. Lakin iqlim dəyişikliyi nəticəsində suyun temperaturunun yüksəlməsi və duzluluğun azalması Vibrio vulnificus üçün daha əlverişli şərait formalaşdırır.