Alkoqol ala bilməyən kişi mağazanı partlatmaqla hədələdi

Rusiyanın Yamalo-Nenets Muxtar Dairəsində yerləşən Nadım şəhərində bir kişi gecə saatlarında ona alkoqol satılmadığı üçün mağazanı partlatmaqla hədələyib.

BAKU.WS ura.ru-ya istinadən xəbər verir ki, hadisə 23 aprel tarixində baş verib. Satıcı gecə alkoqol satmaqdan imtina etdikdən sonra o, səhər saatlarında yenidən həmin mağazaya qayıdıb. Spirtli içki qəbul etmiş vəziyyətdə mağazaya gələn kişi satıcılarla mübahisə edib. Təhlükəsizlik əməkdaşları onu çölə çıxarmağa məcbur olduqları zaman, o, binanı partladacağını bildirib.

Dərhal əraziyə polis əməkdaşları çağırılıb. Onlar mağazanı və ətrafı yoxlasalar da, heç bir partlayıcı qurğu aşkarlanmayıb. Hüquq-mühafizə orqanları tərəfindən saxlanılan şəxs barəsində inzibati protokol tərtib olunub.