"Traktor" vaxtından əvvəl İran çempionu olub

Təbrizin "Traktor" komandası İran Pro-liqasında vaxtından əvvəl çempion olub.

"Report" xəbər verir ki, "qızıl qurdlar" XXVIII turun matçında Qəzvinin "Şəms Azər" komandasını 4:0 hesabı ilə məğlub ediblər.

Oyun Qəzvindəki "Sərdar Azadegan" stadionunda keçirilib. Artıq birinci dəqiqədə xorvatiyalı hücumçu Domaqoy Drojdek hesabı açıb. 8-ci dəqiqədə Əmirhüseyn Hüseynzadə üstünlüyü ikiqat artırıb, 30-cu dəqiqədə isə Drojdek dubl edərək fasiləyə qədər hesabı 3:0-a çatdırıb.

İkinci hissədə "Şəms Azər"in müdafiəçisi Homən Rəbiizadənin meydandan qovulmasından sonra "Traktor" penalti vurmaq hüququ qazanıb. 11 metrlik cərimə zərbəsini yerinə yetirən Rikardo Alveş topu tora göndərərk oyunda yekun hesabı müəyyənləşdirib - 4:0.

"Traktor" qələbə sayəsində mövsümün bitməsinə iki tur qalmış çempionluğu təmin edib.

Tribunalarda yerli iqtidar nümayəndələri və digər rəsmi şəxslər Təbriz komandasının tarixi qələbəsini izləyiblər.