Ronaldonun "7" nömrəli forması ona verildi - 22 yaşlı futbolçunun inanılmaz hekayəsi
Yeniliklərdən dərhal xəbərdar olun
Portuqaliya millisində
Portuqaliya millisində Kriştiano Ronaldonun uzun illər daşıdığı 7 nömrəli forma yeni sahibini tapıb. Bu nömrə 22 yaşlı vinger Karluş Forbşa həvalə edilib. Gənc futbolçu hazırda Belçikanın "Brügge" klubunda nümayiş etdirdiyi oyunla diqqət mərkəzinə düşüb.
BAKU.WS xəbər verir ki, Karluş Forbş qısa müddətdə Avropa futbolunda adından söz etdirməyi bacarıb. O, İngiltərə Premyer Liqasında çıxış edib, "Ayaks"dan qalmaqallı şəkildə ayrılıb, hazırda isə "Brügge"nin əsas hücum silahlarından birinə çevrilib.
Futbola futzaldan başlayıb, "Mançester Siti"nin diqqətini çəkib
Qvineya-Bisaudan olan valideynlərin övladı kimi Portuqaliyada dünyaya gələn Forbş uşaqlıq illərində futzalla məşğul olub. Onun sürəti və texniki bacarığı hələ kiçik yaşlarından diqqət çəkib. Maraqlıdır ki, "Sportinq"in skautları onu başqa futbolçunu izləmək üçün gəldikləri vaxt təsadüfən kəşf ediblər.
Ailəsi daha sonra İngiltərəyə köçüb. Forbşun istedadı burada "Mançester Siti"nin skautlarının diqqətini çəkib. 15 yaşında klubla ilk müqaviləsini imzalayan futbolçu Mançesterə köçərək akademiyada çıxış etməyə başlayıb.
Gənc vinger aşağı yaş qruplarında olduqca uğurlu nəticələr göstərib. O, iki dəfə İngiltərə gənclər Premyer Liqasının qalibi olub, 2023-cü ildə isə 25 qol və 11 məhsuldar ötürmə ilə mövsümün ən yaxşı oyunçusu seçilib.
Onun çıxışı "Mançester Siti"nin baş məşqçisi Pep Qvardiolanın da diqqətindən yayınmayıb. Forbş əsas komandanın məşqlərinə cəlb edilsə də, rəsmi oyunda debüt etmək imkanı qazanmayıb.
"Ayaks"da yaşanan qalmaqal və İngiltərədə uğursuz icarə
2023-cü ilin avqustunda futbolçu karyerasını Niderlandda davam etdirmək qərarına gəlib. "Ayaks" onun transferi üçün "Mançester Siti"yə 14 milyon avro ödəyib.
Forbş yeni klubunda ilk oyunlarından etibarən özünü göstərib. Avropa Liqasında "Marsel"ə qarşı matçda bir qol vurub, bir məhsuldar ötürmə edib. İlk mövsümündə 38 qarşılaşmada 3 qol və 5 assistlə yadda qalıb.
Lakin sonradan əsas heyətdəki yerini itirib. 2024-cü ilin yayında İngiltərənin "Vulverhempton" klubuna icarəyə göndərilən futbolçu burada da gözləntiləri doğrulda bilməyib. Premyer Liqada cəmi 232 dəqiqə meydanda olan Forbş bir məhsuldar ötürmə ilə kifayətlənib.
"Ayaks"a qayıtdıqdan sonra isə klub rəhbərliyi onun gələcək planlarında yer almadığını bildirib. Futbolçunun əsas komanda ilə məşqlərdən kənarlaşdırılması və klubun ona bəzi imkanları məhdudlaşdırması Niderland mətbuatında müzakirələrə səbəb olub.
Nəticədə Forbş Belçikanın "Brügge" klubuna transfer olunub.
"Barselona"ya qarşı möhtəşəm oyun, "İnter"lə matçda assist het-triki
Belçikada ilk vaxtlar qeyri-sabit çıxışı ilə tənqid olunan futbolçu sonradan oyununu xeyli yaxşılaşdırıb. 2025/2026 mövsümündə 22 məhsuldar göstərici (11 qol və 11 assist) qeydə alıb.
Xüsusilə UEFA Çempionlar Liqasının əsas mərhələsində "Barselona"ya qarşı keçirdiyi oyunla diqqət çəkib. Forbş həmin qarşılaşmada iki qol vurub və bir məhsuldar ötürmə edərək komandasının rəqiblə heç-heçə etməsində mühüm rol oynayıb. O, görüşün ən yaxşı futbolçusu seçilib.
2026/2027 mövsümündə də uğurlu çıxışını davam etdirən 22 yaşlı vinger 15 oyunda 5 qol və 8 məhsuldar ötürmə ilə yadda qalıb.
Onun ən parlaq çıxışlarından biri "İnter"ə qarşı Çempionlar Liqası matçında qeydə alınıb. "Brügge"nin qələbə qazandığı görüşdə Forbş üç məhsuldar ötürmə edib, həmçinin komandasına penalti qazandırıb.
Qvardiolanın bəyəndiyi oyun üslubu
Forbş əsasən sağ cinahda çıxış etsə də, hücum zamanı mərkəzə doğru hərəkət etməyi sevir. Rəqib müdafiəçiləri fərdi mübarizədə üstələmək, sürət və driblinq hesabına təhlükəli vəziyyətlər yaratmaq onun əsas üstünlüklərindəndir.
Statistik göstəricilər də bunu təsdiqləyir. O, Belçika çempionatında komandasının ən çox qol vəziyyəti yaradan futbolçularından biridir. Hər oyunda orta hesabla üç uğurlu driblinq cəhdi ilə seçilir.
Bununla belə, futbolçunun inkişaf etdirməli olduğu tərəflər də var. Xüsusilə ötürmələrin dəqiqliyi, hava topları uğrunda mübarizə və cinahdan edilən ortaların keyfiyyəti onun zəif cəhətləri sırasında göstərilir.
Ronaldonun "7" nömrəsi hələlik müvəqqəti ola bilər
Forbşun son mövsümlərdəki çıxışı Portuqaliya millisinin məşqçilər korpusunun da diqqətini çəkib. O, 2025-ci ilin payızında ilk dəfə milli komandaya dəvət olunub. Ermənistanla qarşılaşmada debüt edən futbolçu həmin görüşdə penalti qazanıb.
2026-cı ilin noyabrında isə baş məşqçi Jorje Jezuş onu yenidən milliyə çağırıb və Ronaldonun ayrılmasından sonra boş qalan 7 nömrəli formanı ona verib.
Bununla belə, nömrənin Forbş üçün daimi olaraq saxlanılması hələ dəqiqləşməyib. Növbəti toplanışlarda bu formanı Rafael Leau kimi daha tanınmış futbolçunun geyinməsi də istisna edilmir.
Forbş Danimarka ilə görüşdə meydana sonradan daxil olub və cəmi yarım saat ərzində qapıya zərbə ilə nəticələnən dörd ötürmə verib. Bu, həmin qarşılaşmada ən yaxşı göstərici olub.
Gənc futbolçu hələlik Ronaldonun birbaşa əvəzləyicisi kimi qəbul edilmir. Lakin "Brügge"dəki çıxışı və milli komandadakı fürsətlərindən istifadə etməsi onun Portuqaliya futbolunun gələcək aparıcı simalarından birinə çevrilə biləcəyini göstərir.
Oxşar xəbərlər
Argentinada 18 yaşlı futbolçu başından aldığı zərbədən sonra vəfat etdi
Argentinada futbol matçı zamanı başından top zərbəsi alan 18 yaşlı futbolçu xəstəxanada dünyasını dəyişib. BAKU.WS xəbər verir ki, Abel Nunes üç gün əvvəl "Esey...