Messinin sağlam həyatının 5 sirri açıqlandı

Dünyanın ən güclü futbolçularından biri hesab olunan Lionel Messinin uzun illər yüksək formada qalmasının arxasında sağlam qidalanma, keyfiyyətli yuxu və düzgün həyat tərzi dayanır.

BAKU.WS xəbər verir ki, mütəxəssislər argentinalı ulduzun vərdişlərini elmi baxımdan təhlil edərək beş əsas amili önə çıxarıblar.

Bildirilir ki, Messi karyerasının əvvəlində pizza, qazlı içkilər və qızardılmış yeməklərə üstünlük versə də, sonradan pəhrizini tamamilə dəyişib. O, işlənmiş qidalardan və əlavə şəkərdən imtina edərək Aralıq dənizi tipli qidalanmaya keçib. Futbolçunun menyusunda balıq, dəniz məhsulları, zeytun yağı, tərəvəz və tam taxıllı məhsullar üstünlük təşkil edir.

Messi həmçinin şəkərli qazlı içkiləri mate ilə əvəz edib. Alimlər qeyd edirlər ki, bu içki antioksidantlarla zəngindir və şəkərsiz qəbul edildikdə enerji içkilərinə daha sağlam alternativ hesab olunur.

Araşdırmaya görə, futbolçu bərpa prosesinə də xüsusi önəm verir və gün ərzində təxminən 11 saat yatır. Mütəxəssislər bildirirlər ki, əksər insanlar üçün 7-9 saat keyfiyyətli yuxu kifayətdir.

Ekspertlər Messinin ailəsi ilə keçirdiyi vaxtın da psixoloji sağlamlığına müsbət təsir etdiyini vurğulayırlar. Onların fikrincə, yaxınların dəstəyi stressin azalmasına və ümumi rifahın yaxşılaşmasına kömək edir.