Lavrova sual verdiyi üçün işdən qovulan jurnalist əfv olunmaq üçün müraciət edəcək

Jurnalist Anar Həsənov Azərbaycanın Rusiyadakı səfiri Polad Bülbüloğundan əfv olunması üçün xahiş etməyə hazırlaşır.

BAKU.WS xəbər verir ki, Minval.az saytının etibarlı mənbələrə istinadən verdiyi xəbərə görə, jurnalist Anar Həsənov Azərbaycanın Rusiyadakı səfiri Polad Bülbüloğundan əfv olunması üçün xahiş etməyə hazırlaşır.

Bundan da Anar Həsənovun həm səfirin özü, həm də Polad Bülbüloğunun nüfuz etdiyi şəxslər tərəfindən ciddi təzyiqlərə məruz qalması nəticəsini çıxarmaq olar.

Bildirilir ki, keçən həftə Anar Həsənov Bakıya gələrək yerli KİV-lərdən birində işə düzəlmək istəyib. Lakin onun bütün cəhdləri nəticəsiz qalıb.

Xatırladaq ki, "Lider tv”nin keçmiş müxbiri Anar Həsənov Rusiya xarici işlər naziri Sergey Lavrova Dağlıq Qarabağdakı situasiya ilə bağlı cəsarətli sual ünvanlamış, bu səbəbdən gözdən düşərək işinə son verilmişdi.

Minval az-ın əvvəllər də xəbər verdiyi kimi, jurnalistin Rusiyadakı fəaliyyətinə xitam verilməsi barədə məsələ şəxsən Polad Bülbüloğlunun özü tərəfindən qaldırılıb. Səfir həm Anar Həsənovun verdiyi sualı, həm də Lavrovun qaytardığı cavabı ölkələr arasındakı münasibətlərə xələl gətirdiyini hesab edib.

Polad Bülbüloğlu jurnalistin verdiyi sualı "təxribat” olaraq qiymətləndirmiş və hətta buna görə onu təhqir etmişdi.

Arzu Mirzəyeva

BAKU.WS