Dərmanlar satışa çıxana qədər hansı sınaqlardan keçirilir? - Nazirliyin mütəxəssisi AÇIQLADI

"Hər bir dərman vasitəsi qeydiyyata alınmazdan əvvəl klinikaya qədər (heyvanlar üzərində aparılan tədqiqatlar) və klinik (insanlar üzərində aparılan tədqiqatlar) tədqiqatlara məruz qalır. Bu zaman dərman vasitəsinin toksikoloji, effektivlik və təhlükəsizliyi baxımından araşdırılır".

BAKU.WS xəbər verir ki, bu fikirləri "Sağlam radio"nun (93 FM) "Sağlam səhər" verilişində Səhiyyə Nazirliyinin Analitik Ekspertiza Mərkəzinin Farmakonəzarət şöbəsinin müdiri Fərid Həsənov açıqlayıb.

Onun sözlərinə görə, toksikoloji təsirləri və təhlükəsizliyi dedikdə, həmin dərman vasitəsinin orqanizmə (qaraciyər, ürək, böyrək və s.) hansı zərərləri olması nəzərdə tutulur:

"Bunlar dərman vasitəsinin risklərini qiymətləndirir. Effektivlik deyəndə, hər bir dərman vasitəsi müəyyən məqsəd üçün hazırlanır. Dərman ya xəstəliyi müalicə etməlidir, ya da xəstəliyin simptomlarını aradan qaldırmalıdır. Bunlara isə dərman vasitəsinin faydaları deyilir. Hər bir şirkəti dərman vasitəsini dövlət qeydiyyatına aldırmaq məqsədi ilə onunla bağlı yuxarıda qeyd olunan tədqiqatlardan alınan məlumatlar toplusunu tənzimləyici quruma (Səhiyyə Nazirliyi Analitik Ekspertiza Mərkəzinə) təqdim edir. Qurumda təqdim olunan məlumatların müxtəlif istiqamətli ekspertlər tərəfindən qiymətləndirilməsi və araşdırılması aparılır. Bunun nəticəsində dərman vasitəsinin göstərilən parametrlər üzrə faydaları risklərindən yüksək olduğu təqdirdə o qeydiyyata alınır, bundan sonra ölkənin əczaçılıq bazarına daxil olur. Dərman vasitəsinin qeydiyyatdan sonrakı dövrdə təhlükəsiz istifadəsinin təmin edilməsi məqsədilə farmakonəzarət sahəsi prosesə qoşulur".