İnsan bu yaşdan etibarən qocalmağa başlayır

Rusiyanın Federal Tibbi-Bioloji Agentliyindən (FTXA) bildirilib ki, insan orqanizmində qocalma prosesi 25 yaşdan başlayır.

BAKU.WS xəbər verir ki, bu barədə qurum rəhbərinin birinci müavini Tatyana Yakovleva forumda çıxışı zamanı danışıb.

"Doğrudan da, istəsək də, istəməsək də qocalma 25 yaşdan başlayır", – deyə o qeyd edib.

Yakovlevanın sözlərinə görə, dünyada qocalmanın əlamətləri ilə bağlı müxtəlif nəzəriyyələr mövcuddur. Bu əlamətlər arasında maddələr mübadiləsinin pozulması, sarkopeniya (əzələ kütləsinin azalması) və "zombi-hüceyrələrin" yaranması göstərilir.

Bundan əvvəl isə sağlamlığın yaş artdıqca pisləşəcəyi ilə bağlı güclü narahatlıq keçirən qadınların molekulyar səviyyədə daha sürətlə qocaldığı barədə məlumat yayılmışdı. Bu nəticəyə Nyu-York Universitetinin Qlobal İctimai Sağlamlıq Məktəbindən Mariana Rodrigesin rəhbərlik etdiyi tədqiqat qrupu gəlib. Araşdırma "MIDUS" adlı genişmiqyaslı layihədə iştirak edən 726 qadının məlumatları əsasında aparılıb.

Tədqiqat göstərib ki, mümkün xəstəliklər və fiziki zəifləmə ilə bağlı daha çox narahatlıq keçirən qadınlarda, xroniki xəstəliklərin olub-olmamasından asılı olmayaraq, hüceyrələrin qocalma sürəti daha yüksək olub. Lakin xarici görünüş və reproduktiv yaşla bağlı narahatlıqların sürətli qocalma ilə statistik baxımdan əhəmiyyətli əlaqəsi müəyyən edilməyib.