Bakıda dezinfeksiyanın pullu olması iddiaları barədə rəsmi açıqlama

Son günlərdə paytaxt rayonlarında koronavirus infeksiyasının yayılmasının qarşısını almaq məqsədilə aparılan dezinfeksiya işləri zamanı bəzi şəxslərin özlərini icra hakimiyyəti strukturlarının işçiləri kimi təqdim etməyə çalışaraq pullu xidmətlər göstərməyə cəhd etmələri barədə Bakı Şəhər İcra Hakimiyyətinə (BŞİH) məlumatlar daxil olur.

BŞİH-in Mətbuat xidmətindən BAKU.WS-ə verilən məlumata görə, dövlət balansında olan binalarda, binaların bloklarında, liftlərdə, həyətlərdə və ümumi istifadə yerlərində dezinfeksiya işləri dövlət vəsaiti hesabına aparılır və bunun üçün heç bir vəsait tələb edilə bilməz.

Bakı Şəhər İcra Hakimiyyəti belə hallar mövcud olduğu təqdirdə, hüquq-mühafizə orqanlarına və ya aşağıda qeyd edilən qaynar xəttə müraciət edilməsini xahiş edir.

Qaynar xətt: (012) 492-63-11