Xankəndidə İlham Əliyevdən 100%-lik nəticə - YENİLƏNİB + VİDEO

İşğaldan azad olunan Xankəndi şəhərində 122 saylı Xankəndi seçki dairəsinin 14 saylı məntəqəsində növbədənkənar prezident seçkisi üzrə səsvermənin nəticəsi bəlli olub.

Oxu.Az-ın məlumatına görə, 122 saylı Xankəndi seçki dairəsinin 14 saylı məntəqəsinin sədri İmran Mirzəyev açıqlamasında bildirib ki, prezidentliyə namizədlərdən İlham Əliyev 100% nəticə ilə qələbə qazanıb.

***18:00

Xankəndidə seçici fəallığı açıqlanıb.

BAKU.WS Trend-ə istinadən xəbər verir ki, MSK Katibliyinin İnformasiya Mərkəzinin müdiri Fərid Orucov bildirib ki, saat 17:00-a qədər 5859 nəfər səs verib, 75,7%seçici fəallığı var.

Qeyd edək ki, bu gün Azərbaycanda prezident seçkiləri keçirilir. Prezident seçkilərində 7 nəfərin namizədliyi qeydə alınıb. Onlardan 5 nəfərin namizədliyi siyasi partiyalar tərəfindən, 2 nəfərin namizədliyi öz təşəbbüsü ilə irəli sürülüb. Yanvarın 9-da prezidentliyə namizədliyin qeydə alınması başa çatıb.

Seçici siyahılarında 6 milyon 478 min 623 seçicinin adı var. Onlar ölkə üzrə 6537 məntəqədə səs verəcəklər.

Seçkiləri izləmək üçün indiyə qədər 90 372 müşahidəçi qeydə alınıb. Onların 790 nəfəri 72 beynəlxalq təşkilatı təmsil edən müşahidəçilərdir. Bu müşahidəçilər 89 ölkədəndir.

Seçkilər bütün Azərbaycan ərazisini, o cümlədən, işğaldan azad edilmiş əraziləri əhatə edir. İşğaldan azad edilən ərazilərdə 26 seçki məntəqəsi yaradılıb.

Xaricdə olan Azərbaycan vətəndaşları üçün 37 ölkədə səfirlik və konsulluqlarda 49 seçki məntəqəsi yaradılıb. Həmin məntəqələrdə 23 mindən artıq seçici səsvermə hüququndan istifadə edəcək.

Seçkilərdə 190 beynəlxalq media qurumu iştirak edir. Onların 216 təmsilçisi beynəlxalq müşahidəçi kimi qeydə alınıb.Səsvermə günü adı seçici siyahısında olan, amma məntəqələrə gəlmək imkanı olmayan seçicilərə Seçki Məcəlləsinin tələbinə görə daşınan qutu çatdırılacaq.