İki ayağını Vətənə qurban verən əsgərimizin ürəkparçalayan dramı

2014-cü ilin yayında Ağdam istiqamətində gedən döyüşlər zamanı ağır yaralanmış və Ankarada hər iki ayağı amputasiya edilmiş Qarabağ qazisi Sərxanın dedikləri ilə tanış olun: 

– Deputat Rüfət Quliyevin yanına getdim. Mənə dedi ki, sən mənim seçicim deyilsən. Elə də deyir mənim seçicim deyilsən, elə bil ki, o başqa ölkənin deputatıdır. Heç, ayağa durub mənimlə göruşmədi belə. Yerindən tərpənmədən mənə dedi ki, yanıma gəl. Mən də stollara sürtünə-sürtünə getdim yanına.

– Bakıda ASAN Xidmət-ə getdim. Düşündüm ki, bəlkə mənə orda iş olar. Muhafizəçiyə dedim ki, ya müdürü, ya da müdür müavinini görmək istəyirəm. Mühafizəçi getdi, gəldi. Dedi, burda yoxdurlar. Keçən ilin iyununda Hadı Rəcəblinin də yanına getmişdim. Mən Türkiyədə olanda hər ay evimizə 50 manat yardım edirdi. Necə ki Türkiyədən gəldim, yardımı kəsdi. Yardım üçün yanına getmişdim. Mənə dedi ki, əlilliyindən sui-istifadə edirsən. Bundan sonra daha ona nə deyim?!

– Müdafiə Nazirliyindən mənə telefon nömrəsi vermişdilər ki, nə problemin olsa, başqa yerə getmə, bizə müraciət et. O nömrəyə zəng elədim, elə bil həmin adam deyillər. Məktub yazıram, cavab gəlmir....

Qeyd edək ki, Sərxan Tahirzadə Azərbaycan-Ermənistan qoşunlarının təmas xəttində erməni kəşfiyyat-təxribat qrupunun mövqelərimizə basqınları nəticəsində yaralanıb. O, Atatürk Eyitim və Araşdırma Xəstəxanasının reanimasiya şöbəsində müalicə olunub. Hər iki ayağı kəsilən əsgər müalicəsi bitdikdən sonra vətənə göndərilib. 

BAKU.WS