Revolut müştərilərinin məlumatları dələduzların əlinə keçib

Böyük Britaniyanın rəqəmsal bankı Revolut dövlət qurumlarından birinin adından göndərilən saxta sorğu əsasında müştərilərinin məxfi məlumatlarını üçüncü tərəfə ötürüb.

BAKU.WS xəbər verir ki, şirkət məlumat sızmasını təsdiqləyib. Bildirilir ki, dələduzlar real dövlət qurumuna məxsus domendən istifadə edərək banka saxta sorğular göndəriblər.

Sızma nəticəsində bəzi müştərilərin doğum tarixləri, poçt və elektron ünvanları, telefon nömrələri, şəxsiyyəti təsdiq edən sənədlərin surətləri, həmçinin ehtimal ki, verifikasiya üçün təqdim edilən selfilər, hesab çıxarışları və əməliyyat tarixçələri əldə edilib.

Revolut nümayəndələri bildiriblər ki, hadisə zamanı bankın sistemlərinə və müştərilərin vəsaitlərinə müdaxilə olunmayıb. Şirkət məlumat sızmasından neçə müştərinin təsirləndiyini açıqlamayıb.

Qeyd edək ki, Revolut 2025-ci ilin noyabrından etibarən Rusiya vətəndaşlarının bəzi hesablarını bloklamağa başlayıb.