Qətər ABŞ-dən 42 milyard dollarlıq hərbi texnika alacaq

Qətər ABŞ-dən 42 milyard dollar dəyərində hərbi satınalma həyata keçirəcək.

BAKU.WS xəbər verir ki, bu barədə ABŞ Prezidenti Donald Tramp Yaxın Şərq səfəri çərçivəsində Qətərdə yerləşən əl-Udeyd ABŞ hərbi bazasında çıxışı zamanı məlumat verib.

Tramp bildirib ki, əldə olunmuş razılaşmaya əsasən, Qətər THAAD ballistik raketdən müdafiə sistemi, Pegasus hava yanacaq doldurma təyyarələri və MQ-9B Skyguardian tipli pilotsuz uçuş aparatları da daxil olmaqla müxtəlif hərbi texnikalar alacaq.

Prezident həmçinin ABŞ-nin əl-Udeyd bazasının genişləndirilməsi üçün Qətərin 10 milyard dollarlıq əlavə investisiya yatıracağını açıqlayıb və bu ölkə ilə müdafiə sahəsində sıx əməkdaşlıq etdiklərini vurğulayıb.

Tramp çıxışında qeyd edib: "Daha əvvəl dediyim kimi, ABŞ ordusu üçün misli görünməmiş şəkildə 1 trilyon dollarlıq büdcə təsdiqləyəcəyəm."

ABŞ lideri prezidentliyinin ikinci dövründə 10 trilyon dollar sərmayə cəlb etməyi planlaşdırdığını da deyib və bunun ölkənin müdafiə büdcəsinin daha da artırılmasına imkan verəcəyini qeyd edib.