HƏMAS 3 israilli girovu nə vaxt azad edəcəyini açıqladı

Fələstinin HƏMAS hərəkatı 3 israilli girovu bu gün yerli vaxtla saat 16.00-da azad edəcək.

Bu barədə İsrail Baş nazirinin ofisi məlumat yayıb.

Qeyd edilib ki, artıq bu barədə girovların ailələri məlumatlandırılıb.

***12:23

Fələstinin HƏMAS hərəkatı vasitəçilərə yanvarın 19-da azad ediləcək girovların siyahısını İsrailə verib.

Bu barədə "Kan" telekanalı məlumat yayıb.

***11:36

Qəzza zolağında planlaşdırılan atəşkəs Fələstinin "HƏMAS" hərəkatı azad ediləcək girovların siyahısını İsrailə təqdim etməyənə qədər başlamayacaq.

"Report" N12 telekanalına istinadən xəbər verir ki, bu barədə İsrailin Baş naziri Benyamin Netanyahunun ofisindən bildirilib.

"Ynet" portalının məlumatına görə, "HƏMAS" Qəzza zolağında atəşkəs razılaşmasının birinci mərhələsi çərçivəsində bu gün mübadilə zamanı azad edilməsi planlaşdırılan girovların siyahısının İsrailə verilməsini təxirə salıb.

Bu, texniki səbəblərlə əlaqələndirilir.

İsrailin Baş naziri Benyamin Netanyahu İsrailin hələ də girovların siyahısını almadığını təsdiqləyib. Onun sözlərinə görə, Təl-Əviv azad ediləcək girovların siyahısını alana qədər Qəzza razılaşması çərçivəsində irəliləmək niyyətində deyil.

Fələstinin "HƏMAS" hərəkatı Qəzza zolağında atəşkəs razılaşmasının birinci mərhələsində azad etməyi planlaşdırdığı girovların siyahısını İsrailə təhvil vermədiyini təsdiqləyib.

Müvafiq bəyanat radikalların teleqram kanalında dərc olunub. "HƏMAS atəşkəs razılaşmasının şərtlərinə əməl etdiyini təsdiqləyir, lakin qeyd edir ki, girovların siyahısının verilməsində gecikmə texniki səbəblərlə bağlıdır", - sənəddə deyilir.