Birdən-birə çəki dəyişikliyi və digər əlamətlər – Endokrinoloqa getmək zamanıdır

Hormonlar bədənin düzgün işləməsində böyük rol oynayır. Əgər bu əlamətləri hiss edirsinizsə, endokrinoloqa müraciət etməyiniz vacib ola bilər:

BAKU.WS xəbər verir ki, əgər daim yorğun və halsızsınızsa, bu, qalxanabənzər vəzin zəif işləməsi (hipotireoz) ilə bağlı ola bilər. Bu zaman maddələr mübadiləsi zəifləyir, insan özünü zəif və ağır hiss edir, çəki artımı baş verir. Bəzən bu əlamətlər böyrəküstü vəz problemləri, məsələn, Addison xəstəliyi ilə də bağlı ola bilər.

Əgər çəkinizdə ciddi dəyişikliklər varsa və səbəbini bilmirsinizsə, bu da hormon pozğunluğundan xəbər verə bilər. Qalxanabənzər vəz xəstəlikləri, insulinə qarşı müqavimət və ya böyrəküstü vəzin fəaliyyəti bu hallara səbəb ola bilər.

Tez-tez əsəbləşirsinizsə və ya səbəbsiz yerə ağlayırsınızsa, bu da hormonlarla bağlı ola bilər. Qalxanabənzər vəz problemləri, menopauza və ya böyrəküstü vəz pozğunluqlarının əlamətlərindən biridir.

Əgər menstruasiya gecikir, çox qanaxma olur və ya ümumiyyətlə olmursa, bu hormon sistemi ilə bağlı problemin əlamətidir. Bu, polikistoz yumurtalıq sindromu və ya qalxanabənzər vəzin xəstəlikləri ilə əlaqəli ola bilər.

Əgər daim su içmək istəyirsinizsə və ya ağzınız quruyursa, bu şəkərli diabet və ya prediabetin simptomlarıdır.

Boyun, qolaltı və ya qasıq bölgəsində tünd, qalın və məxməri kimi dəri sahələri yaranırsa, bu insulinə qarşı müqavimət və hormon pozğunluğunun ilkin əlamətləri hesab edilir.

Bu əlamətlər varsa, vaxt itirmədən endokrinoloqa müraciət etmək tövsiyə olunur.