İntiqam hissi azərbaycanlı xanımı qaydasız döyüşçüyə çevirdi

İndi ölkənin qaydasız döyüş üzrə yeganə qadın təmsilçisi, həyatında ilk dəfə beynəlxalq turnirə qatılaraq, dünya çempionu olmaq arzusu ilə Dubayda məşq edir.

BAKU.WS sputnik.az-a istinadən xəbər verir ki, Suada Səlimova ilk baxışdan incə bir xanımdır və heç kimin ağlına belə, gəlməzdi ki, bu xanım sırf kişilərə xas olan idmanla - qaydasız döyüşlə məşğul olur. Hazırda Dubaydakı idman klublarından birində məşq edən Suada karyerasında ilk dəfə olaraq keçiriləcək qaydasız döyüş - ММА (Mixed Martial Arts) üzrə rəsmi yarışa çıxacaq.

Suada Azərbaycanda bu idman növü ilə məşğul olan ilk qadınlardan biridir. Bununla yanaşı, Suada kikboks üzrə dördqat, uşu-sanda üzrə üçqat Azərbaycan çempionu, Sankt-Peterburqda keçirilən döyüş növləri üzrə olimpiadanın qalibi və İspaniyada keçirilən WTKA növü üzrə döyüşlərdə dünya çempionudur. İdmanla uşaq vaxtlardan məşğul olduğunu deyən Suada əvvəlcə bir çox qızlar kimi idmana gimnastikadan başlayıb. Amma sonradan təhsildə axsamamaq üçün gimnastikanı atıb və ali məktəbə girmək məqsədi uğrunda ciddi cəhdlə çalışıb. Hərdən yaşıdları onun xətrinə dəyir, bu incə qızın isə onlara cavab vermək taqəti yox idi.

Onun üçün həlledici nöqtə həmyaşıd qızlarla mübahisə olub. Səbəb isə - bir gəncə olan məhəbbət olub. Qüvvələr bərabərliyinin onun xeyrinə olmadığını görən Suada 16 yaşından kun-fu və uşu-sanda ilə məşğul olmağa başlayıb. İlk məşqçisi isə bu sahədə ad-san qazanmış, 18-qat dünya çempionu Ramil Allahverdiyev idi. Sonradan Suada gündəlik məşqlərə kikboksu da əlavə etdi.

Düzdür, qazandığı təcrübə ona, üstündə mübahisə düşən gəncin ürəyini qaytarmadı. Amma bu gün Səlimova mübahisə etdiyi qızı həmişə minnətdarlıq hissi ilə yada salır - məhz həmin qıza cavab vermək üçün Suada məşqlərə başlamışdı. O, başa düşür ki, gənclərin "ürək hadisələri" arxada qalıb. Yeri gəlmişkən, həmin cavan oğlan nə ona, nə də rəfiqəsinə qismət oldu. Oğlan başqa bir qızı seçdi. Amma Suada taleyinin belə gətirməsindən şikayətlənmir və hətta razıdır. İdmanla yanaşı Suada təhsilini də atmadı. Məktəbi uğurla bitirdikdən sonra Bakı Slavyan Universitetinin "Beynəlxalq əlaqələr və regionşünaslıq" fakültəsinə qəbul olunur. Oxuya-oxuya tikinti şirkətində, və Bakı Ekspo Mərkəzində mühafizəçi işləyir, xarici dillər öyrənir.

İdmançı karyerası boyu onlarla medal və mükafat alan 23 yaşlı Suada bir gün belə, məşqlərini saxlamır: "Bu ilin martında Dubayda işləyən qardaşımın yanına qonaq gəlmişdim. Bir gün burada fəaliyyət göstərən "The Champion Club" klubuna baxmağa getdim. Ad və oradakı şərait, məşqlərin keçirilmə forması çox xoşuma gəldi. Elə buradaca kikboks üzrə üçqat dünya çempionu olmuş bir məşqçi ilə tanış oldum. O, məni yoxladı, döyüş üslubumu bəyəndi və Dubaya köçərək, burada məşq etməyi təklif etdi".

Hazırda Səlimova gündəlik olaraq döyüş növləri idmanı ilə 6 saat məşq edir. Məşqlər siyahısına Braziliya ciu-citsusu da daxil edilib. Yarım ildən sonra Suada həyatında ilk dəfə olaraq qarışıq döyüş növləri üzrə rəsmi yarışa çıxacaq.

Səlimova qarşısına çox aydın məqsəd qoyub: qısa müddətdə bu idman növündə uğur qazanmaq, çempion olmaq və UFC, BELLATOR kimi dünyaca məşhur ABŞ idman şirkətləri ilə müqavilə bağlamaq.

"Mən qaydasız döyüş üzrə idman ustası adı almaq və xanımlar üçün döyüş idman növləri məktəbi açmaq istəyirəm. Ailə barədə onu deyə bilərəm ki, bu məsələni əvvəlcədən planlaşdırmaq olmur, amma qüvvəm çatdıqca məşqləri davam etdirəcəyəm. Ailəm məni tam dəstəklədi. Əvvəllər seçimimə şübhə ilə yanaşırdılar, amma sonradan dəstəklədilər", - deyir xanım idmançı. Baxmayaraq ki, Suada Səlimova xaricdə məşq edir, karyerasının sonuna qədər Azərbaycanı təmsil edəcəyini əminliklə söyləyir.

BAKU.WS