Messi yığma karyerasını başa vurdu – DÇ-2026-dan sonra daha hansı ulduzlar getdi?

Futbol dünyasında bir dövr başa çatır. 39 yaşlı Lionel Messi DÇ-2026-nın finalından sonra Argentina millisindəki karyerasını başa vurmaq qərarına gəlib.

BAKU.WS xəbər verir ki, bununla yanaşı, dünya çempionatından sonra bir sıra tanınmış futbolçular da milli komandalarla vidalaşıb.

Lionel Messi – Argentina

Messi Argentina millisində debütünü 2005-ci ildə, 18 yaşında edib. O, karyerası ərzində milli komandanın heyətində 207 oyun keçirərək rekord müəyyənləşdirib və 125 qolla tarixin ən məhsuldar futbolçusu olub.

Argentinalı ulduz 2021-ci ildə Kopa Amerikanı, 2022-ci ildə dünya çempionatını, 2023-cü ildə isə yenidən Kopa Amerikanı qazanıb.

Argentina 2026-cı ildə dünya çempionatının finalına qədər irəliləsə də, həlledici görüşdə İspaniyaya 0:1 hesabı ilə məğlub olub. Bundan iki gün sonra Messi milli karyerasını başa vurmaq qərarına gəldiyini yazıb.

Manuel Noyer – Almaniya

Almaniya millisinin əfsanəvi qapıçısı Manuel Noyer 2009-cu ildən yığmada çıxış edib. O, 2014-cü ildə dünya çempionu olub və turnirin ən yaxşı qapıçısı seçilərək "Qızıl əlcək" mükafatını qazanıb.

Noyer 2024-cü il Avropa çempionatından sonra milli karyerasını bitirdiyini açıqlasa da, 2026-cı il dünya çempionatında iştirak etmək üçün geri dönüb.

Almaniyanın turniri 1/16 finalda başa vurmasından sonra 40 yaşlı qapıçı milli komandadan birdəfəlik ayrılıb. Noyer Almaniya millisində 128 matç keçirib və 50 görüşdə qapısını toxunulmaz saxlayıb.

Luka Modriç – Xorvatiya

Luka Modriç Xorvatiya millisində ilk oyununu 2006-cı ildə keçirib. O, 2018-ci ildə komandanın kapitanı kimi dünya çempionatının finalına qədər yüksəlib. Xorvatiya Fransaya 2:4 hesabı ilə uduzsa da, Modriç turnirin ən yaxşı futbolçusu seçilib və həmin il "Qızıl top"a sahib çıxıb.

2022-ci ildə Xorvatiya dünya çempionatında üçüncü olub. 40 yaşlı Modriç isə 2026-cı il mundialında turnir tarixinin ən yaşlı məhsuldar ötürmə müəllifi kimi tarixə düşüb.

Modriç Xorvatiya millisində rekord sayda – 202 oyun keçirib və 29 qol vurub.

Neymar – Braziliya

Neymar Braziliya millisinin tarixində ən çox qol vuran futbolçudur. O, yığmada 80 qol vurub və 59 məhsuldar ötürmə ilə də rekord sahibidir.

18 yaşında milli komandada debüt edən Neymar uzun illər Braziliyanın əsas ulduzu hesab olunub. Lakin onun dünya çempionu olmaq arzusu gerçəkləşməyib.

Braziliya 2014-cü ildə yarımfinalda Almaniyaya 1:7 hesabı ilə məğlub olub. Komanda 2018 və 2022-ci illərdə də mübarizəni 1/4 finalda dayandırıb. 2026-cı ildə isə braziliyalılar 1/8 finalda turnirdən kənarda qalıb.

Neymar milli komandada 80 qolla Peleyə məxsus rekordu geridə qoyaraq Braziliya tarixinin ən məhsuldar futbolçusu kimi karyerasını başa vurub.

Riyad Mahrez – Əlcəzair

Riyad Mahrez Əlcəzair millisində 2014-cü ildə debüt edib. O, 2019-cu ildə komandanın Afrika Millətlər Kubokunu qazanmasında mühüm rol oynayıb.

2026-cı il dünya çempionatında Mahrez Avstriya ilə qrup oyununda dubl edib və Əlcəzairin 1/16 finala yüksəlməsinə kömək göstərib. Lakin komanda bu mərhələdə İsveçrəyə 0:2 hesabı ilə məğlub olub.

Mahrez Əlcəzair millisində 120 oyun keçirib və 40 qol vurub.

Patrik Şik – Çexiya

30 yaşlı Patrik Şik də dünya çempionatından sonra Çexiya millisindəki karyerasını bitirmək qərarına gəlib.

Şik 2016-cı ildə yığmada debüt edib. 2021-ci il Avropa çempionatında isə komandanın əsas ulduzlarından biri olub. Həmin turnirdə bombardirlər sırasında yer alan hücumçu Avstriyaya qarşı təxminən 45 metrdən vurduğu möhtəşəm qolla da yadda qalıb.

Şik Çexiya millisində 56 matç keçirib və 26 qol vurub. Bu göstərici ölkə tarixində dördüncü ən yaxşı nəticədir.

Nikolas Otamendi – Argentina

Messi ilə yanaşı, Argentina millisinin digər veteranı Nikolas Otamendi də DÇ-2026-dan sonra yığma ilə vidalaşıb.

38 yaşlı müdafiəçi Argentina millisində 2009-cu ildən çıxış edib və 139 matç keçirib. Bu, komandanın tarixində beşinci ən yüksək göstəricidir.

Otamendi Messi ilə birlikdə 2021 və 2023-cü illərdə Kopa Amerikanı, 2022-ci ildə isə dünya çempionatını qazanıb.

Beləliklə, DÇ-2026 bir sıra futbol əfsanələri üçün milli komanda karyerasının son dayanacağı olub.