Mayk Tayson və Ceyk Pol bir neçə dəqiqəyə milyonlar qazandı

Boks dünyası yutuber Ceyk Pol və keçmiş ağır çəki çempionu Mayk Tayson arasında keçirilən görüşdən danışır.

BAKU.WS xəbər verir ki, boks tarixinin ən bahalı bileti olan görüşdən hər iki boksçu 40 milyon dollar qazanc əldə edib.

Xatırladaq ki, Ceyk Pol və Mayk Tayson arasında peşəkar ağır çəkili boks görüşü Texas ştatının Arlinqton şəhərindəki 80 min nəfərlik AT&T Stadionunda keçirilib.

Pol boks karyerasından böyük sərvət qazanıb və 27 yaşlı boksçunun təxmini xalis sərvəti 80 milyon dollar civarındadır. Bu döyüş ona böyük gəlir gətirib və bəzi məlumatlara görə, Paulun bu döyüşdən əldə etdiyi gəlir 40 milyon dollar olub. Pol avqust ayında verdiyi açıqlamada "Mən buradayam, 40 milyon dollar qazanacağam və əfsanəni nokaut edəcəyəm. Məni başqa heç nə maraqlandırmır" deyib.

Tayson bu mübarizəni maddi qazanc üçün aparmadığını bildirib. 58 yaşlı boks əfsanəsi "Bu döyüşdən qazanacağım pul həyat tərzimi dəyişməyəcək. Bu döyüş maliyyə məqsədi ilə keçirilmir. Sadəcə özümü sınamaq istəyirəm" deyib. Bununla belə, döyüşün ümumi dəyəri təxminən 80 milyon dollardır.