Mahir Emreli oynadı, "Konyaspor" qələbə qazandı

Azərbaycan millisinin futbolçusu Mahir Emreli Türkiyə "Konyaspor"unda növbəti oyununu keçirib.

"Report"un məlumatına görə, 26 yaşlı hücumçu komandasının səfərdə "Kasımpaşa"ya 2:1 hesabı ilə qalib gəldiyi Superliqanın XXXI tur matçının iştirakçısı olub.

Görüşə ehtiyatda başlayan forvard 39-cu dəqiqədə Robert Muriçin əvəzinə meydana çıxıb. Emreli oyun ərzində qol və ya məhsuldar ötürmə ilə yadda qalmayıb.

"Konyaspor"un qollarını 30-cu dəqiqədə Fransisko Kalvo və 45+6-cı dəqiqədə Mame Diuf vurublar. Meydan sahiblərindən isə 13-cü dəqiqədə Mamadu Foll fərqlənib.

Bu qələbə ilə xallarını 42-yə çatdıran "Konyaspor" 8-ci pilləyə yüksəlib. 33 xalı olan "Kasımpaşa" isə 12-ci sırada qalıb.

Qeyd edək ki, Mahir Emreli müqavilə ilə Xorvatiyanın "Dinamo" (Zaqreb) klubuna məxsusdur. O, cari mövsümün sonunadək "Konyaspor"a icarəyə verilib.

Qalereya