Telefonu yastığın altında saxlamaq beyin xərçənginə səbəb olur?

Telefonu gecə yastığın altında saxlamaq vərdişinin zərərli və hətta təhlükəli olduğu iddia edilir. Sosial şəbəkələrdə və bəzi qeyri-rəsmi mənbələrdə bu vərdişin beyin xərçəngi yarada biləcəyi, həmçinin yuxuya mənfi təsir göstərdiyi barədə fikirlər yayılıb. Lakin müasir elmi araşdırmalar bu iddiaları təsdiqləmir.

BAKU.WS xəbər verir ki, mütəxəssislərin qənaətinə görə, mobil telefonlarla beyin xərçəngi arasında birbaşa əlaqə müəyyən edilməyib. Smartfonlar radiotezlikli, yəni ionlaşdırmayan şüalanma yayır. Bu növ şüalanma rentgen və ya qamma şüaları kimi DNT-ni zədələmir və genetik mutasiyalara səbəb olmur.

Amerika Xərçəng Cəmiyyətinin izahına görə, radiotezlikli dalğalar yalnız çox yüksək gücdə olduqda toxumaları qızdıra bilər. Lakin mobil telefonların yaydığı enerji səviyyəsi bunun üçün kifayət etmir və insan bədənində istilik dəyişiklikləri yaratmır.

Araşdırmalara əsasən, ən yüksək şüalanma telefonla danışıq zamanı baş verir. Cihaz istifadə olunmadıqda, xüsusilə yastığın altında sadəcə "passiv rejimdə" qaldıqda, təsir səviyyəsi minimal olur.

Beynəlxalq "INTERPHONE" layihəsi və digər genişmiqyaslı tədqiqatlar da mobil telefon istifadəsi ilə beyin şişləri arasında sabit və inandırıcı əlaqə aşkar etməyib. ABŞ Milli Xərçəng İnstitutunun icmallarında da oxşar nəticələr qeyd olunur.

Bununla belə, bəzi beynəlxalq qurumlar radiotezlikli şüalanmanı "mümkün kanserogen" (2B qrupu) kimi təsnif edir. Bu kateqoriyaya dair sübutlar məhdud və ziddiyyətlidir.

Mütəxəssislər bildirir ki, əsas risk telefonun özündə deyil, istifadə vərdişlərindədir. Xüsusilə gecə saatlarında smartfondan istifadə yuxu keyfiyyətini azalda bilər. Bildirişlərin yoxlanılması və sosial şəbəkələrə giriş beynin istirahət rejiminə keçməsini çətinləşdirir.

Yuxu üzrə ekspertlər telefonun yataq otağında saxlanmamasını və mümkün olduqda başqa otaqda qoyulmasını tövsiyə edir.