Azərbaycan Tibb Universitetinə yeni prorektor təyin edilib

Azərbaycan Tibb Universitetində (ATU) rəhbər heyətdə yeni təyinat gerçəkləşib.

BAKU.WS xəbər verir ki, universitetin rəsmi məlumatına görə, Anar Əzəm oğlu Ağayev ATU-nun Tədris işləri üzrə prorektoru vəzifəsinə gətirilib.

Anar Ağayev uzun illər tibb təhsili və səhiyyə idarəçiliyi sahəsində çalışıb. O, 2001-ci ildə Azərbaycan Tibb Universitetində əmək fəaliyyətinə başlayaraq müxtəlif vəzifələrdə – baş laborant, stajor-assistent, müəllim və dekan müavini kimi fəaliyyət göstərib. 2008-2017-ci illərdə dekan müavini, 2017-2022-ci illərdə isə dekan vəzifəsində çalışıb. 2018-ci ildən professor elmi adını daşıyır.

A.Ağayevin fəaliyyəti yalnız ATU ilə məhdudlaşmayıb. O, 2022-2025-ci illər ərzində TƏBİB-də müxtəlif rəhbər vəzifələrdə işləyib. Son olaraq TƏBİB-in İcraçı direktorunun müşaviri olub.

5 sentyabr 2025-ci ildən etibarən Anar Ağayev Azərbaycan Tibb Universitetinin Tədris işləri üzrə prorektoru kimi fəaliyyət göstərəcək.