Kənd yumurtası baha, fabrik yumurtası ucuz - Səbəbi açıqlandı

Azərbaycanda bu ilin yanvar-sentyabr aylarında 911 milyon ədəd yumurta və diri çəkidə 73,6 min ton quş əti istehsal edilib.

BAKU.WS-in məlumatına görə, ötən ilin eyni dövrü ilə müqayisədə yumurta istehsalı 3,4%, quş əti istehsalı isə 30,5% artıb.

Hesabat dövründə quşçuluq müəssisələrində quşların sayı da 25,3% artaraq 13,2 milyonu ötüb.

Azərbaycanda kənd yumurtasının qiymətində artım müşahidə olunsa da, fabrik yumurtasının qiymətində ciddi dəyişiklik qeydə alınmır. Yerli istehsalın davamlılığı və bazarda məhsul təklifinin qorunması bu sabitlikdə mühüm rol oynayır.

Hacıqabul Quşçuluq Şirkətindən verilən məlumata görə, müasir quşçuluq müəssisələrində tətbiq edilən yemləmə, saxlama və istehsal texnologiyaları yumurtanın keyfiyyətinə müsbət təsir göstərir. Məhsulun keyfiyyəti isə təkcə onun kənddə və ya fabrikdə istehsal olunmasından deyil, toyuqların qidalanmasından, saxlanma şəraitindən, yumurtanın təzəliyindən və düzgün qorunmasından asılıdır.

Quşçuluq sektorunun inkişafı daxili tələbatın yerli məhsul hesabına ödənilməsi, ərzaq təhlükəsizliyinin möhkəmləndirilməsi və idxaldan asılılığın azaldılması baxımından əhəmiyyətlidir. Yerli istehsalın artması bazarda məhsul bolluğuna və qiymət sabitliyinin qorunmasına da kömək edir.

Bununla yanaşı, yem, enerji və daşınma xərclərinin dəyişməsi istehsalçılara təsir göstərən əsas amillərdəndir. Keyfiyyətə nəzarət, müasir istehsal texnologiyaları və ixrac imkanlarının genişləndirilməsi isə yerli quşçuluq müəssisələrinin rəqabət qabiliyyətini artırır.

Ümumilikdə, fabrik yumurtasının qiymətinin sabit qalması istehlakçılar üçün əlçatanlığın qorunması, yerli istehsalın davamlılığı isə bazarın təminatı baxımından əhəmiyyət daşıyır.

Azərbaycan Quş əti, Yumurta İstehsalçıları və İxracatçıları Assosiasiyasının sədri Mürvət Həsənli BAKU.WS-ə bildirib ki, Azərbaycanda istehsal olunan yumurtalar daxili bazarla yanaşı, xarici ölkələrə də göndərilir:

"Yerli məhsulların əsas ixrac istiqamətləri Yaxın Şərq ölkələridir. Hazırda iki əsas istehsal müəssisəsi xarici bazarlara yumurta tədarük edir. Həftəlik ixrac təxminən 1,5 milyon ədəd, aylıq göstərici isə 12 milyon yumurta səviyyəsindədir. Azərbaycan yumurtaları əsasən Yaxın Şərq ölkələrinə ixrac olunur. Qış mövsümündə isə ABŞ bazarına da məhsul göndərilir".

Orxan Hüseyn