80 yaşlı Emel Sayın bu səbəbdən konsertlərini təxirə saldı

Məşhur müğənni Emel Sayın səhhətində yaranan problemlər səbəbindən bu ay keçirilməsi planlaşdırılan iki konsertini təxirə salıb.

BAKU.WS "Haber Global"a istinadən xəbər verir ki, 80 yaşlı sənətçi sosial şəbəkədə yaydığı açıqlamada 14 iyunda Bursada, 17 iyunda isə İstanbulda baş tutmalı olan konsertlərin başqa tarixlərə keçirildiyini bildirib.

"Qısa müddət ərzində müalicə almağım lazımdır. Mənə ünvanlanan xoş arzulara görə hər birinizə təşəkkür edirəm" - deyə o qeyd edib.

Sənətçi yaxın günlərdə paylaşacağı videomüraciətdə konsertlərin təxirə salınmasının səbəbləri barədə daha ətraflı məlumat verəcəyini də qeyd edib.

Xatırladaq ki, Emel Sayının Bursa və İstanbuldakı açıq hava konsertləri yay mövsümünün ən çox gözlənilən musiqi tədbirləri sırasında yer alırdı.