Müzəffər Azərbaycan Ordusu: Müstəqilliyin və suverenliyin əsas qarantı

Qalib Azərbaycan Ordusu bu gün özünün 108 yaşını qeyd edir. O ordu ki, 44 gün ərzində 30 illik işğala son qoydu, bir gündə əzəli torpaqlarımızda separatizmin, terrorun mənbəyini qurutdu. 108 illik şanlı yol özünün enişli-yoxuşlu axarı ilə seçilir. Lakin bu gün heç bir qüvvənin dəyişdirə bilməyəcəyi bir həqiqət var. Müstəqil, güclü Azərbaycan dövlətinin təhlükəsizliyi, suverenliyi, sərhədlərinin toxunulmazlığının əsas qarantı məhz qalib statusunu daşıyan müzəffər Silahlı Qüvvələrimizdir.

BAKU.WS mövzu ilə bağlı "Kaspi" qəzetinin məqaləsini təqdim edir:

Müstəqil siyasi kursun ən böyük dayaqlarından biri

Bu gün Prezident İlham Əliyevin rəhbərliyi ilə həyata keçirilən müstəqil siyasi kursun ən böyük dayaqlarından biri də ordumuzdur. Müzəffər Ali Baş Komandanın ərazi bütövlüyümüzün bərpası ilə bağlı qarşıya qoyduğu vəzifəni geri addım atmadan sonuna qədər şərəflə, peşəkarcasına və böyük vətənpərvərlik ruhu ilə yerinə yetirən Azərbaycan Silahlı Qüvvələridir. Məhz bu reallıqdan çıxış edərək bu gün Silahlı Qüvvələrin daha da inkişaf etdirilməsi, peşəkarlığının artırılması və maddi-texniki bazasının gücləndirilməsi dövlətimizin başlıca prioritetlərindəndir.

Bu missiyanı ən vacib məqamlardan birinə çevirən şərtlər həm də bölgəmizdə, sərhədlərimizə yaxın coğrafiyada yaşanan gərginliklər, artan münaqişələr və hərbi toqquşmalardır. Geosiyasi kataklizmlər fonunda Azərbaycana qarşı meydana çıxa biləcək çağırışlar və təhdidlərin qarşısını almaq, bu niyyətdə olanların planlarını pozmaq üçün ən təsirli vasitə məhz güclü, peşəkar və müasir maddi-texniki bazaya malik Silahlı Qüvvələrin mövcudluğudur.

Artan hərbi büdcə

Bunun məntiqi nəticəsi olaraq dövlət büdcəsindən ordumuzun inkişafı və təminatına ayrılan xərclər hər il artırılır. Hərbi büdcə tək müdafiə qabiliyyəti və maddi texniki bazanın inkişafı demək deyil. Buraya Silahlı Qüvvələrin şəxsi heyətinin sosial-iqtisadi durumunun yaxşılaşdırılması, mənəvi-psixoloji hazırlığın ən yüksək səviyyədə təşkili və digər çox mühüm istiqamətlər də daxildir. Həyata keçirilən islahatlar hazırda Azərbaycan Ordusunun bütün bölmələrinin vahid orqanizm kimi peşəkar fəaliyyətini şərtləndirir.

Cənubi Qafqazın ən güclüsü

44 günlük Vətən müharibəsində əldə edilən təcrübə, çoxsaylı beynəlxalq təlimlər, strateji müttəfiqlərimizlə aparılan qarşılıqlı təcrübə mübadiləsi Azərbaycan Ordusunu Cənubi Qafqazın ən güclü silahlı qüvvəsinə çevirib. 2026-cı il üzrə hərbi gücün "Global Firepower" reytinqinin məlumatlarına əsasən, Azərbaycan Silahlı Qüvvələri dünyanın ən güclü orduları sırasında 60-cı yerdə qərarlaşıb.

Reytinq çərçivəsində 145 ölkənin hərbi güc indeksinin hesablanması üçün 60-dan çox amil qiymətləndirilir. Bu amillərə ölkənin maliyyə vəziyyəti, coğrafi mövqeyi, logistika imkanları və digər göstəricilər daxildir. Burada Azərbaycan Ordusunun döyüş təcrübəsinin hələ də dünyanın aparıcı hərbi universitetlərində ciddi şəkildə araşdırıldığı amilini də xüsusi vurğulamaq yerinə düşər.

Hərbi-texniki əməkdaşlığın genişlənən coğrafiyası

Silahlı Qüvvələrin inkişafında maddi-texniki baza amili böyük önəm kəsb etməkdədir. Son illərdə ölkə rəhbərliyinin elan etdiyi prioritetlərə uyğun olaraq bu sahədə də ciddi addımlar atılır. Azərbaycanın hərbi-texniki əməkdaşlıq vektorları hazırda özünün çoxistiqamətliliyi ilə seçilir. Böyük Britaniya, İtaliya, ABŞ ilə yanaşı, Çinlə də bu istiqamətdə uğurlu əməkdaşlıq modeli qurulub. Türkiyə, Pakistan, İsrail və digər strateji müttəfiqlərlə hərbi-texniki əməkdaşlıq platforması daha da dərinləşdirilib. Bu gün Azərbaycan Ordusunun inventarında sözügedən ölkələrin 5-ci nəsil müharibə doktrinasına uyğun istehsal edilən ən müasir silah texnologiyaları yer alır. Hava Hücumundan Müdafiə sistemləri, pilotsuz uçuş aparatları və zərbə dronları, artilleriya sistemləri, raket sistemləri və sair sahib olduqlarımızın çox kiçik bir qismidir.

Yerli müdafiə sənayesi inkişaf edir

Təbii ki, bu istiqamətdə yerli müdafiə məhsullarının da rolu əhəmiyyətli dərəcədə artıb. Azərbaycan peşəkar ordu quruculuğu prosesində Silahlı Qüvvələrin yerli təyinatlı məhsullarla təmini səviyyəsinin artırılmasını da prioritet elan edib. Yerli müdafiə sənayesi də müasir innovativ texnologiyalar əsasında müasir dövrün hərbi çağırışlarına cavab verəcək səviyyədə qurulub. Bu proses artıq davamlı mahiyyət daşımaqdadır. Yerli istehsal gücünün artırılması Azərbaycan Ordusunun manevr imkanlarını genişləndirir və lazımi anda təchizat kanalları ilə ən yüksək səviyyədə təmininə şərait yaradır.

Beləliklə, 108 illik inkişaf yolunda Azərbaycan Ordusu özünün ən çətin missiyasını - ərazilərimizin işğaldan azad olunması və suverenliyimizin bərpası vəzifəsini uğurla yerinə yetirərək qalib xalqın qalib ordusu statusunu əldə etdi. 44 günlük Vətən müharibəsi Azərbaycan xalqının Silahlı Qüvvələrinə, onun Ali Baş Komandanına olan inam və etimadının, sevgisinin nə dərəcədə güclü olduğunu göstərdi. Yuxarıda qeyd etdiyimiz məqamlar dövlətimiz kimi, ordumuzun da daim güclənməsini, inkişaf etməsini tələb edir.

Bu gün Azərbaycan Ordusu müasir maddi-texniki bazaya, peşəkar zabit heyətinə, yüksək və vətənpərvər döyüş ruhuna, zəngin hərbi təcrübəyə malikdir. Komando birliklərinin yaradılması, Milli Müdafiə Universitetinin fəaliyyəti, Türkiyə ilə strateji hərbi əməkdaşlığın inkişafı və beynəlxalq tərəfdaşlıqlar Silahlı Qüvvələrimizin daha da güclənməsinə xidmət edir. Güclü ordu Azərbaycanın müstəqilliyinin etibarlı təminatçısıdır.